Слово о Рождестве Господа и Бога и Спаса нашего Иисуса Христа, в том же и на иудея*

   Се и вертеп, и ясли, и новорожен Младенец в них, восклонен Материю своею неискусомужною, и волсви, дарми честными чествующе, и звездою чрез естественною наставляеми свыше и чин ангельский, вопиюще: слава царствующему в вышних, и мир живущим на земли, и пастырие, слышаще свыше: родися вам в Вифлиеме веси Христос надежда вашя? Воистину предивна вся и явственне возвещающа сему Младенцу быти Богу, всем Царю; но может бо никтоже глаголати сим бывшим по прилучаю; издавна бо сия прорекошяся о Нем, и о сих неложни сведетели богодухновенныя книги священных будущих глаголивых муж. Да посрамляется убо непокоривый жидовскый язык, пререкуя дерзостно толь явленейшим вещем! Да или яко Бога поют вкупе с нами Иисуса, зряще вся, елика прорекошся о Нем священными пророкы преже многих лет и сбышася о Нем неложно, прокаженных очищающу, а слепым зрение подающу и мертвыя из гроб воставляющу, словом, или в своей злобе злохотно пребывающе, ни тем прочее священным пророком да повинуются, аки такова солгавшым на Христа, ниже да чяют иного приити, аки предуставленному времени явления Его, издавна уже трищи прешедшу. Аще убо неложен есть глаголяй желающему пророку навыкати разрешение злым своего языка: седмижды, веждь, десять седмицы прекратишася о людех твоих и о граде святем, яко запечатлети прочее и видение мудраго пророка, и да приидет Святый святых; сие же пророчество яве бысть, понеже прочее по Христе никто в них воста будущая предвозвещая. Ащели же аки истинным и Божиим другом пророком веры имут, и ухо свое тем приклоняют, Христа Бога нашего да поют несумненно, зане о Сем едином сбытие неблазнено приимшым всем вкупе, яже о Нем, пророчествам, имиже крепкий Бог и велик самодержец поется, и «миру и великому совету ангел и князь», — якоже вопиет Исаия (Ис. 9:6) Ащели же страсть претерпе, что то не Божеством бо пострада, но плотию, юже восприят за милосердие велие; и се волею и по благоволению Отца безначального, тако спасти изволившу весь род человеческый, прежде убо многих лет и сие предрекшим образовательне о Нем богодухновенным пророком. Поклонитеся убо достоит Благодати, яко Божественному дару, а не отвращатися чина исцеления и, идеже и егда и како велит Бог, воследовати Ему, аки своим родителем незлобивыя дети, оно мыслящим, яко всепремудр сый и всепреблагый и сама Правда, ничто беззаконно, ниже нелепотно, ниже вышше силы нашея нам отнюдь повелевает, и сие да, отмыв нас всякия вкупе злобы, богоподобныя славы добротами украсит. Или убо иными грядущего Мессию пророчествии покажут без страстей и смерти и единым человеческим естеством и славою и богатством и высотою не кончаемого царствия, якоже им ся мнит, седяща на царских престолех всеми концы владети, или сие не могуще показати, да покланяются с нами вкупе Ему и священными пророки, в двою естеству Бога вкупе и человека совершенна того же глаголющими яве, и плотию своею смерть претерпевша, и в третий паки день воскресша из мертвых, и явльшася другом своим, и на десных престолех безначального Родителя своего седяща яко Бога и Господа всемь. Но что к сим стропотный и непокоривый род? Ниже благохвально, ниже пригодно отнюдь, рече, еже такова мудрствовати о Сущем выше всякия видимыя и невидимыя твари. Но о, исполнены паче всех человек непокорения и всякаго безумия и гордости! Аще сице вам сия видится, ниже по Его нетленному образу да глаголите Его, ниже от земли создавша Адама, ниже ногу омываема человеческим образом и худою кущею объемлема, ниже мясо и соли инима вкусити и предъглаголюща чадо состаревшися супружнице, ниже борбы составляюща и стегно противоборца своего ногою сляцающа хитростию, ниже в неопаляемой убо, осияваемой же огнем купине, глаголюща с Моисеом, ниже в образе ангельсте сошедша прелагати преподобным отроком в росу пещный пламень. Ащели же сия вся прияти изволил есть, якоже есть писано, спасти желая свое создание, егоже ради вся созда и егоже, яко же слышимь, господина показа всем, иже на земли; почто без ума, о несмыслении, укоряете и отметаетеся толь неизреченнаго и милости исполнена человеколюбия Его о человеческом роде, яко Ему изволити и страсть и гроб? Аще бы не была зело любима и пречестна Царю всем вещь, сложный от персти и души, ниже создал бы его по Божественному образу своему и подобию, ниже пакы согрешша пощадел бы его всяко, но, или истребил бы его абие, или затворил бы в нерешимых узах преисподних мук, ниже его ради очищаше всю землю бесчислеными водами, и потопляше убо весь род вкупе человеков и скотов бессловесных, оставив им мало семя в кивоте древяне, ниже бы Египта казнил губительными ранами и потопляше убо Фараона со всем его воинством, ниже бесчислена и предивна чудеса о нас сотворил бы убо, елика показа в родех древних, имиже яве показа, елико промышление имать и Божественно любление к созданию своему. Зело убо лепо бе и нужно всем Царю о толь благороднем создании своем, бесы же губительными прельщеннем бывшем, терпети вся, елика в человечестей плоти своей пострада волею, не да точию покажеть свою, юже изначала имеяше, неисчетную любовь к человеком, но да и, понеже пресущное Божественное существо неприступно есть отнюд и невидимо, веселие довольно преподобнии стяжавают зряще в человеческом образе Господа своего блестяща им испущаемыми непрестанно молнии от Божественнаго и присносущнаго света, егоже ради наипаче восприят человеческый зрак; быти убо хотяше воистину несовершено даемое тогда праведным даяние благ вечных, якоже и обедующим у некоего великаго царя и предобрейших убо вкушающым снедей, лишенным же царского зрения и вещания, уметы вся им и плевы являются, аще и сладчяйша суть снедаемая и пиемая, и исполнени суть печали мысли их. Но сия убо, елико возможе человеческий немощный разум, предложил есть вам на уверение истины; а неложно виновно есть толикому человеколюбию Его, якоже Ему изволити и страсть и смерть и гроб, Той сам совершенно весть; понеже никтоже позна ум Вышняго, Божественное слово вопиет. Но ниже хульное, якоже вы глаголете, но и зело достохвально и есть и судится от всех благоразумных, еже согласно мудрствовати вкупе с богодухновенными пророчествии о крайнешей Божией любви, ейже познание известно и всемудрое дело есть смерть, юже волею прият на кресте, смертию убо человеческое, а воскресением из мертвых уверяя свое Божественное естество.
   Неправедно убо есть отнюдь мудрствовати оно о Нем, Егоже всесильному мановению всяческая повинуются, яко за еже не имети Ему ин образ исцеления, за то потребова такового худого исцеления, егоже худое и несильное явися мудрейшее всякой премудрости и всякой силы сильнейшее. Но хотя делом увещевати нас смирена мудрствовати и о самей жизни удобь нерадети и Божественныя любве ничтоже ино мнети выше и лучшее, изволил есть и страдати на кресте, и погребен быти, всем желающим яже в будущем благая предложив Себе образ и указ жития совершенного; пресветлых бо венец и предивных почестей трудом величайшим, глаголют, подобает стяжавати. Кыя же больши почести могут быти мыслящим добре паче жизни вечныя и некончаемаго Божия царствия, ихже получити не возможно инако, но точию многыми поты и труды зельнейшими? Но сия убо сице. Вас же, понеже ничтоже ино не повинует славити Христа Бога Царя, поне многолетный сей, иже на вы Божий гнев, иже последними лютыми и всякым бесчестием рассеянных во всех языцех озлобляет вас, да увещевает неразумныя ваша мысли, не лестца, якоже вы хулите, о богомерзстии, ниже злодея, ниже Божиим заповедем противящася, но самого преславнаго Божия Сына возлюбленнаго безчестною смертию сея жизни извести, Егоже пролитая неповинная кровь, юже взясте на главах ваших и на чадах ваших, всегда гонит вы. Аще бо лестеца и злодея, якоже вы хулите, убили бысте, воистину возвысил бы убо вас Бог зело велелепне, и множайши пророки паче, нежели преже, послал бы вам, и вашея державы наибольше утвердил бы; неложно бо обетовавие Его, еже глаголет: «прославляющая Мя и Аз прославлю, а безчествующии Мя примут безчестие» (1Цар. 2:30); егоже искуство уже приясте на многа лета всех вкупе и отечества, и державы, и пресловутого храма вашего лишени бывше, и самые свыше на вы посылаемые Божие пророческие благодати, еяже прегрешивше, жилища прочее явистеся всякия злобы и бесовския прелести. К сим же и оно подобает трезвеным разумом рассуждати и богомудреным мерилом прилежне рассмотрити, яко аще не сей бы был предпроповеданный Мессия, и аще, якоже вы хулите, льстец, а не Бог крепкий бы был, ниже о Нем богодохновенная пророчества вся имешя были неблазнено сбытие свое, ниже разорити храм и град ваш, якоже прорекл есть, возмогл бы и вас самех зле погубити, ниже во благоверие разногласная колена человеков призывати и мглу истуканных отгнати. Сия же единому Богу возможна точию, от человек же ни единому. Колицы бо многажды всякия премудрости исполнении, еще же и высотою царскою обложени, тщашяся своих единоплеменник под своим законом, ихъже сами умыслишя своею мудростию, подвести, и едва возмогошя един язык на мало лет число подвести под игом своих законов; Христос же Царь мой, гоним от всех, бежа, умирая и осужаем, с двеманадесять точию мужи бескнижными, ничтоже ино ведущими, точию лов рыбный, не един язык, ни два, но елику землю обтекает огнеобразное солнце и океан окружает, в свет благоверия и дела правды приведе, отстави от идолослужения и всякия злобы, ни мечь, ни копие, ни щит, ни броня взем ниже ухыщренными действовав лестьми, но глаголы нехитростными и чудесы предивными всем предлагая слово благоверия. И еже есть достойно великого удивления, яко совершенного целомудрия крайнейшия правды тем дая, и соблюдающым убо сия непорочно жизнь обещавая и царство небесное, а преступающым пакы претя огнем, выну палящим, и преисподними различными муками, не точию не ужасил есть их, но и толь благопокоривых имел их к своим заповедем, яко и горчяйшим мукам онем телеса своя мощно предати. И бе тогда видети умиленое вкупе некое и предивное зрение, христоборцев убо аки зверей сыроядцев верным нападающих, верных же паки мечем умилено закалаемых и огнем жегомых, возраст всяк и род за Христа, якоже и младые дети и девы дерзати на горые муки и самые смерти, теплейшим Христовым одержимыя рачением. Како же сия, аще не всесилен Бог бе Христос, удобь сотворил бы вскоре по всей вселенней? Како же ся разорила бы и изчезла, искоренився вкупе отвсюду идольская прелесть? Како, еже преже гнушаемое и проклятое и ненавидимое, аки смертное орудие, крестообразное древо, ныне многожелаемо и всечестно есть покланяние и почитание? Зане жизни подательно и бесчисленых благ; мертвые бо абие восставляет образуемо, и болезни исцелевает и недуги всякие, и полки губительных бесов далече прогоняет, и оружие во бранех крепчайше есть. Кто же укрепивый сие сицевыыи крепчайшими силами и всем вкупе верным многожелаемо показа, яко и самем царем с желанием многым на своих главах приимати то, начертаемо рукою Божиих служителей? точию Той сам всесильный Божий Сын Исус Христос, иже на том плотию издше, яко человек, имя же Его страшное призываемо абие отгонит вся злое крестообразным знамением. Да поется убо и покланяем да бывает Той, иже яко Бог царствуя надо всеми и человек совершен, виже естеству человеческому в Божество преложившуся, виже паки в онь Божественному естеству, во от обоих едив состав, едино не смесно растворение, истинен же человек и Бог, в вышних царствуя, равен сый по всему ражающу же Его Уму, иже выше всякаго ума и слова есть, судия же грядый страшнейший да чаем есть делом и умышлением и словесем нашим. Да отвержем убо от сердец наших всякое безумеое ослушание и плотолюбивую похоть! Судию да умолим истиным покаянием, отступивше всяческая злобы нашея; священныя же любве, милости же и правды и целомудрия добраго крепко да держимся всегда, понеже «вера, не причастна благых дел, мертва есть» (Иак. 2:20) якоже слышим, якоже и тело, разлучившееся души.

Информация о первоисточнике

При использовании материалов библиотеки ссылка на источник обязательна.
При публикации материалов в сети интернет обязательна гиперссылка:
"Православная энциклопедия «Азбука веры»." (http://azbyka.ru/).

Преобразование в форматы epub, mobi, fb2
"Православие и мир. Электронная библиотека" (lib.pravmir.ru).