Акафисты

Акафист Пресвятей и Животворящей Троице

   Иерей: Благословен Бог наш.
   Чтец: Слава Тебе, Боже наш, слава Тебе. Царю Небесный: Трисвятое: по Отче наш.
   Тропари сия, глас 6й
   Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас!
   Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших: но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имя Твое призываем.
   И ныне: Милосердия двери отверзи нам, благословенная Богородице: надеющийся на Тя да не погибнем, но да избавимся Тобою от бед: Ты бо еси спасение рода христианскаго.
   Верую во единаго Бога Отца, Вседержителя…
   Стихиры, глас 8й. Самогласны
   Воспоим вси боголепно песньми божественными, Отца Безначальна, Сына Превечна и Духа Соприсносущна, Триипостасную державу, Едино Божество, едино царство и господство, едину волю и силу, пред Ними же всяко колено преклоняется небесных, земных и преисподних. (Дважды.)
   Отцу и Сыну и Духу верно поклонимся вси, Троице Единосущней и Нераздельней, Юже выну славословят на небеси безплотных чинове: мы же Тоя милости и щедроты исповедуя, на земли возопиим: Отче создавый, Сыне искупивый, и Душе Святый освящаяй всех нас, Троице Пребожественная, слава Тебе! (Дважды.)
   Егда в начале род человечь восхотел еси создати, Господи, тогда к Сыну Твоему собезначальному и Духу соприсносущному рекл еси, Благоутробне: сотворим человека по образу и подобию Нашему! Темже человеколюбному о нас смотрению чудящеся, вопием: Троице Пресвятая и благопромыслительная, Творче и Боже наш, слава Тебе!
   Егда от Иоанна крещение совершашеся во Иордане, Тройческое явися поклонение, Отец возлюбленнаго Сына именуяй, Сын приемляй крещение от раба, Дух Святый сходяй с небесе в виде голубине: темже Божественным видением таинству наученнии, с верою вопием: Троице единосущная, тако явитися благоизволившая, помилуй и спаси нас!
   Слава, и ныне, глас тойже: Приидите людие, Триипостасному Божеству поклонимся, Сыну во Отце со Святым Духом: Отец бо роди бездетно Сына соприсносущна и сопрестольна, и Дух Святый бе во Отце, с Сыном прославляемы едина сила, едино существо, едино Божество, Емуже покланяющеся, вси глаголем: Святый Боже, вся содеявый Сыном, содейством Святаго Духа: Святый Крепкий, Имже Отца познахом, и Дух Святый причде в мир: Святый Безсмертный, утешительный Душе, от Отца исходяяй и в Сыне почиваяй, Троице Святая, слава Тебе!
   На стиховне стихиры, глас 2й
   Троицу единосущную песнословим, Отца и Сына и Святаго Духа, Сию бо проповедаша вси пророцы, и апостоли с мученики.
   Стих: Сердце чисто созижди во мне, Боже, и Дух прав обнови во утробе моей.
   Света безначальна и присносущна Отца, света незаходима и соприсносущна Сына, со Духом предвечно исходным светом, верою славим, любовию поем и надеждою превозносим во вся веки.
   Стих: Не отвержи мене от лица Твоего и Духа Твоего Святаго не отыми от мене.
   Имеяй на небеси неумолкныя певцы славы Твоея, безплотных чинове, приими и от нас на земли хваление, Троице Пребожественная, ихже создала еси по образу и подобию Твоему.
   Слава, и ныне: Видехом свет истинный, прияхом Духа Небеснаго, обретохом веру истинную, нераздельней Троице покланяемся, Та бо нас спасла есть.
   Таже: Господи, помилуй. (12 раз.) Слава, и ныне: Приидите, поклонимся: (Трижды.)Псалом 138: Господи, искусил мя еси и познал мя еси...
   Тропарь, глас 8й
   Благословен еси Трисвятый Господи Боже наш, Иже всю тварь премудростию Твоею создавый, и падший род человечь милостию Своею не оставивый, покаявшимся же грешником живот вечный даровати обещавый, Человеколюбие, слава Тебе!
   Господи, помилуй (трижды). Слава, и ныне: Псалом 50... Помилуй мя, Боже...

Акафист Божественным Страстем Христовым

   Иерей: Благословен Бог наш.
   Чтец: Слава Тебе, Боже наш, слава Тебе! Царю Небесный: Трисвятое: по Отче наш...
   Тропари сия, глас 6й
   Помилуй нас, Господи, помилуй нас: всякаго бо ответа недоумёюще, сию Ти молитву, яко Владыце, грешнии приносим: помилуй нас.
   Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших, но призри и ныне, яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имя Твое призываем.
   И ныне: Милосердия двери отверзи нам, благословенная Богородице, надеющийся на Тя да не погибнем, но да избавимся Тобою от бед: Ты бо еси спасение рода христианскаго.
   Верую во единаго Бога Отца Вседержителя.
   Стихиры, глас 6й
   Подобен: Все отложше:
   Все истощил еси богатство щедрот Твоих, живый в мире любовию, истинная любы Иисусе, егда Себе Самаго учеником Твоим дал еси в снедь на вечери: грядый же на страсть вольную, напоследок доброе соблюл еси вино, Животворящую Кровь Твою, и прежде Твоея смерти погреблся еси в сердцах другов Твоих Пречистыми Тайнами: погреби убо моя страсти, Владыко, да Тебе любовию величаю, Твою душу за мя положщаго! (Дважды.)
   Все сокровище наше взял еси, Иудо беззаконный, человекоубийцам Иудеом в руце предав Иисуса. О несмысленный предателю! Апостол нареченный, иже иных спасения искати имевый, себе погубил еси: нищым крадый милостыню, милостиваго Бога от тебе удалил еси: Сему любовию покланяемся, в Немже есмы, живем и движемся.
   Вся совершил еси заповеди, в живот вечный ведущыя: препоясався лентием, ноги умываеши учеником: коль красны ноги благовествующих! Да покорят вся под нозе Твоя апостолы, Сам Ся ныне полагаеши низу: священником небесная мудрствовати хощеши, прах от ног их отрясая. И мене убо, Иисусе мой, всего сквернаго очисти, да чисте Чистому во веки поработаю.
   Слава: Прискорбную душу до смерти хлебом животным молитвы укрепив, и вином духа возвеселив, дерзновенно к смерти приближился еси. О гласа любвеобильнаго! Отче, мимо от Мене неси чашу сию, да не пию ея от Израиля, егоже водою напоих в пустыне: аще же воля Твоя, да пию, Плоть и Кровь Мою в вечную им подам жизнь.
   И ныне: Что тако скорое совершаеши течение на вольную страсть, Сыне Мой, Дева глаголаше. Ты же отвещал еси: Отца Моего волю сотворити должен есмь: душу Мою власть имам положити, и власть имам паки прияти ю: но на умерщвление вольное гряду, да умерщвленнаго человека воздвигну.
   На стиховне стихиры, глас 1й
   Пришел еси истинное солнце на запад, к ногам Иуды приклонився. О смирения Твоего! первее безстудному ноги умываеши, за безчестие честь подавая: омый убо и мене слезами моими, Иисусе, да очищен творю волю Твою.
   Стих: Поскрежеташа на мя зубы своими.
   Воистинну народ сей не весть закона, Законодавца бо убити хощет пребеззаконный. Грехи наша очисти, греха не имый Господи, да не с возстающими на Тя осудимся.
   Стих: Смотрях одесную и возглядах, и не бе знаяй Мене.
   Не вем Человека, глаголеши Петре, Егоже и Бога исповедал еси: Сей есть Человек и Бог, к Егоже ногам припадая рекл еси: Сей есть Человек и Бог, в водах утопающу тебе подавый руку: Сей есть Человек, Иже тещу твою огнем жегому исцели: Сей есть Человек, с Нимже добро быти рекл еси. Призри на мя, Иисусе, якоже воззрел еси на Петра, и не рцы мне в день испытания: не вем тя! Слава, и ныне:
   Область темная воистинну Тебе неприступнаго света в нощи безчестием, ранами и руганием неистово сретает: сия Тебе, Христе, воздаде род беззаконный, яко в нощи извел еси их рукою крепкою и мышцею высокою от руки фараони: сия Тебе воздаде, благодетелю Иисусе, род неблагодарный, яко препитал еси их манною в пустыни и напоил еси водою из камене. Да постыдятся убо врази Твои, покажи силу Твоего Божества, яко Сын еси и Бог мой, Дева слезящи вещаше.
   Таже: Господи, помилуй. (12раз.) Слава, и ныне: Приидите, поклонимся (трижды).Псалом 142: Господи, услыши молитву мою... Слава, и ныне: Аллилуиа (трижды). Бог Господь, и явися нам.
   Тропарь, глас 8й
   Егда славнии ученицы на умовении вечери просвещахуся, тогда Иуда злол честивый сребролюбием недуговав омрачашеся, и беззаконным судиям Тебе праведнаго Судию предает. Виждь, имений рачителю, сих ради удавление употребивша: бежи несытыя души, Учителю таковая дерзнувшия. Иже о всех благий, Господи, слава Тебе!
   Слава: глас 2й: Спасение соделал еси посреде земли, Христе Боже; на Кресте пречистеи руце Твои простерл еси, собирая все языки, зовущия: Господи, слава Тебе!
   И ныне: глас той же: Благообразный Иосиф, с древа снем Пречистое Тело Твое, плащаницею чистою обвив, и вонями во гробе нове покрыв положи.
   Господи, помилуй (трижды): Слава, и ныне: Псалом 50: Помилуй мя, Боже...

Акафист Живоносному Гробу и Воскресению Господню

   Иерей: Благословен Бог наш: лик: Аминь. Иерей с диаконом поет тропарь.
   Тропарь, глас 5й
   Христос воскресе из мертвых, смертию смерть поправ, и сущим во гробёх живот даровав. (Трижды.)
   По сем лик поет тойже тропарь...
   Таже иерей глаголет стих: Да воскреснет Бог: и прочие, с пением от лика на кийждо стих: Христос воскресе...
   На Господи воззвах, стихиры, глас 8й
   Днесь ад стеня вопиет: уне мне бяше, аще бых от Марии Рождшагося не приях: пришед бо на мя, державу мою разруши, врата медная сокруши, душы, яже содержах прежде, Бог сый, воскреси. Слава, Господи, Кресту Твоему и Воскресению Твоему!
   Днесь ад стеня вопиет: разрушися моя власть, приях Мертваго яко единаго от умерших: Сего бо держати отнюдь не могу, но погубляю с ним имиже царствовах: аз имех мертвецы от века, но Сей всех воздвизает. Слава, Господи, Кресту Твоему и Воскресению Твоему!
   Днесь ад стеня вопиет: пожерта бысть моя держава, Пастырь распятся, и Адама воскреси, имиже царствовах, лишихся: и яже пожрох возмогий, всех извергох. Истощи гробы распныйся, изнемогает смертная держава: слава, Господи, Кресту Твоему и Воскресению Твоему!
   Ины стихиры, глас 6й
   Победу имеяй, Христе, юже на ада, на Крест возшел еси: да во тме смерти седящыя воскресиши с Собою, иже в мертвых свободь: источаяй живот от Своего света, всесильне Спасе, помилуй нас!
   Днесь Христос смерть поправ, якоже рече воскресе, и радование мирови дарова, да вси взывающе, песнь тако рцем: Источниче жизни, Неприступный Свете, всесильне Спасе, помилуй нас!
   Тебе, Господи, сущаго по всей твари, грешнии камо бежим; на небеси Сам живеши, во аде попрал еси смерть: во глубины морския; тамо рука Твоя, Владыко. К Тебе прибегаем, Тебе припадающе молимся: воскресый из мертвых, помилуй нас!
   Слава, и ныне: Богородичен, глас 1й
   Всемирную славу от человек прозябшую, и Владыку рождшую, небесную дверь, воспоим Марию Деву, безплотных песнь и верных удобрение: Сия бо явися небо, и храм Божества: Сия преграждения вражды разрушивши, мир введе и Царствие отверзе: Сию убо имуще веры утверждение, поборника имамы из Нея рождшагося Господа. Дерзайте убо, дерзайте людие Божий: ибо Той победит враги, яко всесилен.
   На стиховне стихиры, глас 3й
   Страстию Твоею, Христе, омрачивый солнце и светом Твоего воскресения просветивый всяческая, приими нашу вечернюю песнь, Человеколюбие. Стих: Господь воцарися, в лепоту облеиеся.
   Живоприемное Твое возстание, Господи, вселенную всю просвети, и Твое создание истлевшее призва: тем же клятвы Адамовы свободшеся, вопием: всесильне Господи, слава Тебе!
   Стих: Ибо утверди вселенную, яже не подвижится.
   Да род наш от смерти, Христе, избавиши, смерть претерпел еси: и тредневен из мертвых воскресый, с Собою воскресил еси иже Тя Бога познавших, и мир просветил, еси, Господи, слава Тебе!
   Стих: Дому Твоему подобает святыня, Господи, в долготу дней.
   Во свете Твоем, Владыко, узрим свет, Человеколюбие: воскресл бо еси из мертвых, спасение роду иеловеиескому даруяй, да Тя вся тварь славословит единаго безгрешнаго, помилуй нас.
   Слава и ныне: Богородичен
   Тя, ходатайствовавшую спасение рода нашего, воспеваем, Богородице Дево: плотию бо от Тебе восприятою Сын Твой и Бог наш, Крестом восприим страсть, избави нас от тли яко Человеколюбец.
   Таже: Бог Господь, и явися нам.
   Тропарь, глас 6й
   Воскресение Христово видевше, поклонимся Святому Господу Иисусу, Единому Безгрешному, Кресту Твоему покланяемся, Христе, и святое Воскресение Твое поем и славим: Ты бо еси Бог наш, разве Тебе иного не знаем, имя Твое именуем. Приидите, вси вернии, поклонимся святому Христову Воскресению: се бо прииде Крестом радость всему миру. Всегда благословяще Господа, поем воскресение Его: распятие бо претерпев, смертию смерть разруши.

Акафист Покрову Пресвятыя Богородицы

   Иерей: Благословен Бог наш:
   Чтец: Слава Тебе, Боже наш, слава Тебе. Царю Небесный: Трисвятое: по: Отче наш.
   Тропари сия, глас 6й
   Помилуй нас, Господи, помилуй нас; всякаго бо ответа недоумеюще, сию Ти молитву, яко Владыце, грешнии приносим: помилуй нас.
   Слава: Господи, помилуй нас, на Тя бо уповахом; не прогневайся на ны зело, ниже помяни беззаконий наших, но призри и ныне, яко благоутробен, и избави ны от враг наших, Ты бо еси Бог наш, и мы людие Твои, вси дела руку Твоею, и имя Твое призываем.
   И ныне: Милосердия двери отверзи нам, благословенная Богородице, надеющийся нат Тя да не погибнем, но да избавимся Тобою от бед: Ты бо еси спасение рода христианскаго.
   Верую во единаго Бога Отца Вседержителя...
   Стихиры, глас 1й Подобен: О дивное чудо!
   О великое заступление печальным еси, Богородице Чистая, скорая Помощница, спасение мира и утверждение, милости пучина, Божия мудрости источник, миру Покров: сию воспоем вернии, светлый омофор Ея хваляще неизреченно: обрадованная радуйся, с Тобою Господь, подаяй миру Тобою велик» милость! (Дважды.)
   О чудное украшение всем верным еси, пророческое истинное событие, апостолом слава, и мучеником удобрение, девству похвала, и всему миру предивный Покров: покрый, Владычице, омофором милости Твоея, Императора, и вся люди, вопиющыя: обрадованная, радуйся, с Тобою Господь, подаяй миру Тобою велию милость! (Дважды)
   Град, почитающий Тя и по долгу славящий, покрываеши, Пречистая, Твоим омофором честным, от нахождения противных, от глада же и труса и междоусобныя брани, Дево неискусобрачная Богоневесто, человеков покров и заступление.
   Освящается небо и земля, церковь же светится, и людие вси веселятся: се бо Мати Божия, со ангельскими воинствы, с Предтечею и Богословом, с пророки же и апостолы, невидимо вшедши, за христианы молится Христу, помиловати град и люди, славящыя Тоя Покрова праздник.
   Слава и ныне, глас 8й:
   Срадуются с нами умная вся чиноначалия, духовно совокуплыне чувственный лик, видяще Царицу и Владычицу всех, многоименне верными славиму: радуются же и дуси праведных сущий зрителие видения, на воздусе молебно простирающу всечестныя Свои руце, просящу умирения миру и царем державы и утверждения, и спасения душ наших.
   На стиховне стихиры, глас 3й
   Наста днесь пресветлый праздник, Пречистая Дево, честнаго Твоего Покрова, паче солнца освещаеши люди, верою от чиста сердце Тебе истинную Матерь Божию исповедающыя, и Сыну Твоему вопиющыя: Христе Боже, молитвами Приснодевы, чисто и без нетления рождшия Тя, не предаждь врагом ратующим Твое достояние: но яко Милостив спаси в мире душы нашя.
   Стих, глас 5й: Слыши дщи и виждь, и приклони ухо Твое.
   Воспоим людие светло Давидскую песнь, Отроковице, невесте Божий, Матери Царя всех Христа: предста Царица одесную Тебе, Владыко, рясны златыми одеяна, и преукрашена Божественными олептами: Сию бо Избранную в женах паче всего мира удобрив, благоизволи родитися от Нея великия ради милости: и Сию Помощницу людем Своим дарова, строити и покрывати от всякия беды рабы Своя, едину Благословенную.
   Стих, глас 2й: Лицу Твоему помолятся богатии людстии.
   Пренепорочную всех Царицу, Пречистую Деву, сошедшеся вернии, ублажим днесь Матерь Христа Бога: присно бо к Сыну руце милостивно простирает, Юже предивный Андрей виде на воздусе, честным Своим покровом люди покрывающую, и Той умильно возопиим: радуйся Покрове и заступление и спасение душам нашым!
   Слава и ныне, глас 3й:
   Приидите вси празднолюбцы, честный покров Божия Матере ублажим: к Сыну бо руце милостивно простре, и святым покровом Ея мир огражден бысть: темже усты и сердцем, и песньми и пении духовными, со всеми притекающими празднуем светло.
   Таже. Господи, помилуй (12 раз). Слава и ныне: Приидите, поклонимся. (Трижды.)Псалом 142. Господи, услыши молитву мою. Слава, и ныне: Аллилуиа. (Трижды.) Бог Господь, и явися нам.
   Тропарь, глас 4й
   Днесь благовернии людие, светло празднуем осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим покровом, и избави нас от всякаго зла, молящи Сына Твоего и Бога нашего, спасти душы нашя!
   Таже псалом 50. Помилуй мя, Боже.

Служба и акафист Святому Архангелу Михаилу

   Начало обычное
   На Господи, воззвах, стихиры,
    глас 4й
   Подобен: Яко добля:
   Трисолнечнаго Божества предстоятель сый светлейший, Михаиле Архистратиже, с горними силами зовеши, радуяся: свят еси Отче, свят еси собезначальное Слово, свят еси и Святый Душе, едина Слава, едино Царство и естество, едино Божество и сила.(Дважды.)
   И вид твой огнен, и доброта чудна, Михаиле первоангеле: невещественным бо естеством преходиши концы, исполняя повеления всех Творца, силен в крепости твоей познаваем. Дважды.)
   Творяй Ангелы Твоя, якоже писано есть, духи, и служащия Тебе пламень огненный, посреде чинов Твоих Архангельских первенствующа показал еси, Господи, Михаила Архистратига, Твоим мановениям повинующася, Слове, и песнь трисвятую со страхом возглашающа Славе Твоей. Дважды.)
   Слава: Византиево, глас 7й:
   Срадуйтеся нам вся Ангельская чиноначалия: предстоятель бо ваш и наш предстатель, великий Архистратиг, в днешний день в честнем его храме собором верных по долгу усердно прославляется и в молитвах призывается: покрый нас кровом крилу твоею, великий Архистратиже Михаиле.
   И ныне: Богородичен, глас тойжде:
   Срадуйтеся нам вся девственных ликостояния: Предстательница бо наша, и Ходатаица, и Покров, и великое прибежище, в днешний день всечестнаго празднества, вся скорбящия утешает: темже по долгу ублажающе Сию, возопиим: покрый ны Божественным предстательством Твоим, Пречистая Богородице Владычице!
   На стиховне стихиры, глас 1й
   Чиноначальник Вышних сил Михаил, днесь нас к торжеству созва, сохраняли ны от всякаго диаволя обстояния: приидите убо празднолюбцы цветы добродетелей вземше, чистыми помыслы и совестию благостоянною, Архангелов предстоятеля почтим: той бо, непрестанно Богу предстоя и трисвятую песнь воспевая, молит спастися душам нашим.
   Стих: Творяй Ангелы своя духи, и слуги свои пламень огненный.
   Небесным первствуя в дерзновении мнозем, и предстоя престолу страшному в славе, самовидче неизреченных тайн, спаси ны, Михаиле Архистратиже, сущие в нуждах бед и напастей, молитвами твоими.
   Стих: Хвалите его вси Ангели его, хвалите его вся силы его.
   Безплотных Ангелов первый еси, и служитель Божественнаго Света, самовидец же и таинник чудес, темже от бед избави ны, Михаиле Архистратиже, чтущия имя твое благочестно, и поющия во славу Пресвятыя Троицы.
   Слава, и ныне, глас 8й
   Небесных чинов начальник, служитель же славы Божественныя достойно быв повелением Зиждителя твоего, христианам еси ходатай верный невещественною твоею силою вся земная охраняя; темже по долгу восхваляем тя вси, преславное твое днесь совершающе торжество, Михаиле Архистратиже. Ты же моли Христа Бога, грехов оставление даровати любовию тя прославляющим.
   Тропарь, глас 4й
   Небесных воинств Архистратиже, молим тя присно мы недостойнии, да твоими молитвами оградиши нас кровом крил невещественныя твоея славы, сохраняя ны, припадающия прилежно и вопиющия: от бед избави ны, яко чиноначальник Вышних сил.
   Господи помилуй. (Трижды). Слава, и ныне: Таже псалом 50: Помилуй мя, Боже...

Акафист к причащению Святых Таин

    Кондак 1
   Избранный Женише душ и сердец, вочеловечением Своим и смертию на Кресте обручивый Себе на веки весь род человечь, и давый нам в залог вечныя жизни самое пречистое Тело и Кровь Свою, се по гласу Твоему и аз недостойный, дерзая прихожду к Божественной трапезе Твоей, и поражен величием ея, вопию:
   Иисусе, Боже сердца моего, прииди и соедини мя с Тобою на веки!
    Икос 1
   Ангела Твоего к провидцу Исайи со углем горящим от олтаря Небеснаго послал еси, во еже очистити тем устне его, егда видев Тя, седяща на престоле, о нечистоте своей сокрушашеся: аз же, оскверненный душею и телом, како дерзну приступи™ ко причащению Божественных Твоих Тайн, аще не Ты Сам очистиши мя свыше; тем же из глубины души вопию Ти:
   Иисусе всеблагий, коснися огнем благодати Твоея и моих нечистых устен; Иисусе, попали терние моих многих прегрешений!
   Иисусе, созижди во мне сердце чисто, и обнови во утробе моей дух правый; Иисусе, изведи из темницы страстей бедную душу мою!
   Иисусе, потреби во мне нечистые помыслы и злыя похотения; Иисусе, направи слабыя стопы моя на путь заповедей Твоих!
   Иисусе, Боже сердца моего, прииди и соедини мя с Тобою на веки!
    Кондак 2
   Желанием возжелавый ясти со ученики последнюю пред страданием Твоим пасху, да преподаси им среди нея последний и наибольший залог любве Твоея, и прежде двою дние предпослал еси двоя от них во Иерусалим, да шедше уготовают ю. Поучаяся отсюда, како и нам подобает благовремение уготовляти себе к снедению нашея Божественныя пасхи, сиречь, Тела и Крови Твоея, благодарственно зову Ти: Аллилуиа!
    Икос 2
   Иззуй сапоги от ногу твоею, земля бо, на ней же стоиши, свята есть, рекл еси Моисею из купины, горевшей и несгаравшей, от невидимаго во оной присутствия Твоего. Сосуд с Божественным Телом и Кровию Твоею воистину более и святее неопалимыя купины есть: аз же перстен, нечист, продан под грех: тем же со смирением и верою вопию Ти:
   Иисусе всемогущий, совлеки мя ветхаго человека с деяньми его; Иисусе, умертви семя тли во мне гнездящееся!
   Иисусе, расторгни узы греха, имиже связа мя враг; Иисусе, подаждь ми сердце смиренно и дух сокрушен!
   Иисусе, отжени от мене искушение и соблазны; Иисусе, утверди мя в вере и любви к Тебе!
   Иисусе, Боже сердца моего, прииди и соедини мя с Тобою на веки!
    Кондак 3
   Отцы ваши ядоша манну в пустыни и умроша: Аз есмь хлеб, сходяй с небесе, да аще кто яст от него, жив будет во веки; и хлеб, егоже Аз дам, Плоть Моя есть, юже Аз дам в живот мира, рекл еси иудеом, искавшим видети от Тебе знамение с небеси, подобное манне Моисеевой: еже мы слышаще и событие предреченнаго видяще, со страхом зовем: Аллилуиа!
    Икос 3
   Востав с вечери, якоже повествует святой Иоанн, и препоясався лентием, умыл еси ноги учеником, научая сим, да не приступаем к Божественней трапезе Твоей неомытые слезами покаяния во грехах наших. Ощущая презельную нужду сего таинственнаго омовения, и скудость слез ожесточеннаго сердца моего, с Петром вопию Ти:
   Иисусе преблагий, Сам ми омый не нозе токмо, но и руце и главу; Иисусе, обнажи предо мною бездну душевнаго моего растления!
   Иисусе, разверзи во мне источник сокрушения сердечнаго; Иисусе, ороси мя каплями Твоего милосердия!
   Иисусе, обвей мя страхом суда и мук вечных; Иисусе, возбуди совесть, спящую во мне, и укрепи глас ея!
   Иисусе, Боже сердца моего, прииди и соедини мя с Тобою на веки!
    Кондак 4
   Не сей ли есть Иисус, сын Иосифов, его же мы знаем отца и матерь; како убо глаголет сей, яко с небесе снидох; и како может дати нам плоть свою ясти, глаголаху между собою жидове, услышав о преславном обещании Твоем датися в снедь верным, не ведуще, по окаменению сердец своих, со смирением веровати и взывати к Тебе: Аллилуиа!
    Икос 4
   Аще на снесте плоти Сына Человеческаго и не пиете крове Его, живота не имате в себе, провещал еси косным, во еже веровати иудеом, еже слово жестоко к слышанию показася и некиим от ученик Твоих, неведущим еще тайн Царствия Божия: мы же, озаренные светом Евангелия и откровенным лицем Божественную славу Твою зряще, с верою и любовию зовем Ти:
   Иисусе, вся могий величеством силы и державы Твоея; Иисусе, творяй и совершали паче, неже можем разумети и помыслити!
   Иисусе, манну с неба, некогда в знамение настоящаго таинства, одождивый; Иисусе, к преобразованию тогожде воду из камене источивый!
   Иисусе, облако крастелей в напитание алчущим в пустыни иудеом пославый. Иисусе, пред очию самих сомнящихся иудеев, пятию хлебы пять тысяч народа насытивый!
   Иисусе, Боже сердца моего, прииди и соедини мя с Тобою на веки!
    Кондак 5
   Ядущим на вечери учеником, прием хлеб, благословив и преломив, подал еси им, рек: приимите, ядите, сие есть Тело Мое, за вы ломимое, во оставление грехов; потом же чашу подав, рекл еси: пиите от нея вси: сия есть Кровь Моя, за вы изливаемая, во оставление грехов. Сему Божественному и пресладкому гласу внемлюще, со благодарением зовем: Аллилуиа!
    Икос 5
   Ядый Мою Плоть и пияй Мою Кровь во Мне пребывает, и Аз в нем; той имать живот вечный, и Аз воскрешу его в последний день, си есть в воскресение живота и блаженства: сего убо вожделеннаго воскресения в живот ища сподобитися, из глубины души вопию Ти:
   Иисусе, приблизися к ищущему соединения с Тобою; Иисусе, вниди во утробу, во вся составы и вся кости моя!
   Иисусе, буди светом моего помраченнаго ума; Иисусе, наполни собою ненасытимую всем миром бездну моего сердца!
   Иисусе, вещай гласом моея совести; Иисусе, движи и управляй моею волею!
   Иисусе, Боже сердца моего, прииди и соедини мя с Тобою на веки!
    Кондак 6
   Аминь, аминь, глаголю вам: един от вас предаст Мя, рекл, еси в скорби духа учеником Твоим на вечери. Они же, аще и чисти от замысла предания, еда аз есмь, вопрошаху Тя кийждо, показуя сим глубину своего смиренномудрия. Аз же что реку Ти, седмижды на день падаяй и изменяяй Тебе; обаче Ты Сам соблюди мя, да не отпаду в конец, взывая Ти благодарне: Аллилуиа!
    Икос 6
   Якоже розга не может плода творити о себе, аще не будет на лозе, тако и вы, аще во Мне не пребудете, а иже будет во Мне и Аз в нем, той сотворит плод мног: сице тайнодействуя, поучал еси возлюбленные ученики Твоя на пути в Гефсиманию. Сему убо наставлению внемля и ведый немощь естества моего без благодати Твоей, прилежно вопию Ти:
   Иисусе, пренебесный делателю, Сам мя всади в живоносный вертоград Твой; Иисусе, лоза истинная, прикрепи мя к Тебе, яко розгу дикую!
   Иисусе, кореню неизсыхающий, исполни мя соком жизни вечныя; Иисусе, победителю всякия мертвенности, отреби еже изсохло есть во мне от зноя страстей!
   Иисусе, красный добротою, украси мя цветами благих чувств и помышлений; Иисусе, богатый в милости, ущедри мя плодами истиннаго покаяния и правды!
   Иисусе, Боже сердца моего, прииди и соедини мя с Тобою на веки!
    Кондак 7
   И, кто есть предаяй Тя, вопросившу ученику, иже возлеже на вечери на персях Твоих; той есть, отвещал еси, емуже Аз, омочив в солило хлеб, подам; ' и омочь хлеб подал еси Иуде Симонову Искариотскому, подвизая его на покаяние; он же ожесточен сый духом злобы, не восхоте разумети гласа любве своего Учителя и Господа: каковаго жестокосердия да буду избавлен благодатию Твоею, зовя Ти выну: Аллилуиа!
    Икос 7
   Щадя немощь естества нашего, отвращающагося вкушения плоти человеческой, не яве, но под видом хлеба и вина благоволил еси преподати нам пречистое Тело и Кровь Твою. Чудяся о таковом снисхождении премудрости Твоея к немощи естества нашего, благодарне славословлю Тя сице:
   Иисусе, премудре и человеколюбие строяй все дело спасения нашего; Иисусе, самыя спасительныя таинства Твои приспособляяй к немощи нашего разумения и чувств!
   Иисусе, во уверение сомнящихся, на святой трапезе многажды вместо хлеба и вина самое Тело и Кровь Твою проявивый; Иисусе, достойным служителям олтаря Духа Пресвятаго, на освящение даров сходяща, показавый!
   Иисусе, вместо недостойных служителей олтаря Ангелов Твоих невидимо, для совершения Божественнаго таинства, посылаяй; Иисусе, явлением чудес на святой трапезе, многия из самых зловерных к вере обративый!
   Иисусе, Боже сердца моего, прииди и соедини мя с Тобою на веки!
    Кондак 8
   И по хлебе, сиречь, по вкушении от поданнаго Тобою хлеба предателю, якоже повествует святой Иоанн, вниде в онь сатана. Оле страшныя казни за неверие! Оле злополучнаго жребия предателя! Еже во спасение долженствовало быти, в смерть и погибель ему обретеся! Пред таковым убо судом правды Твоея благоговея, со страхом и трепетом зову Ти: Аллилуиа!
    Икос 8
   Сие творите в Мое воспоминание, рекл еси учеником на вечери, преподав им под видом хлеба Тело, а под видом вина Кровь Свою. Тем же убо, елижды от хлеба ядим и от чаши пием, смерть Твою возвещаем, по слову святаго Павла. Воспоминая убо ныне страдания Твоя со умилением, зову Ти:
   Иисусе, в руце врагов Твоих для спасения мира Себе произвольне предавый; Иисусе, легионом Ангелов в защиту Твою явитися не попустивый!
   Иисусе, невернаго ученика воззрением на него и гласом алектора к покаянию обративый; Иисусе, Каиафе и Пилату, неразумие вопросившим Тя, ответа не давый!
   Иисусе, со креста распеншим Тя у Отца отпущения грехов просивый; Иисусе, Матери Твоей возлюбленнаго ученика премилосердне усыновивый!
   Иисусе, Боже сердца моего, прииди и соедини мя с Тобою на веки!
    Кондак 9
   Иудо, лобзанием ли Сына Человеческаго предаеши, воззвал еси горце к ученику неверному, егда он прииде со спирою в вертоград Гефсиманский, ища предати Тя лобзанием. Обаче и сей преострый глагол не порази раскаянием души, во зле ожесточенный. Ведый убо непостоянство и моея воли, страшуся, да не дам Ти когда и аз неблагодарный лобзания Иудина: Ты Сам убо укрепи мя благодатию Твоею, да с благоразумным разбойником выну зову: Аллилуиа!
    Икос 9
   Отче, да вси едино будут, якоже Ты во Мне, и Аз в Тебе, да и тии в Нас едино будут, да и мир веру имет, яко Аз от Тебе изыдох, тако возгласил еси в последней великой молитве к Отцу. Сему пресладкому гласу Твоему последуя и о силе молитвы Твоея дерзая, с верою возглашаю Ти:
   Иисусе, вся совокупляли во едино, возсоедини всех нас неразлучне с Тобою и Отцем Твоим; Иисусе, вся примиряли, даждь, да будем вси единомысленни в вере и любви к Тебе!
   Иисусе, нетерпяй вражды и разделений, потреби злочестивыя ереси и расколы; Иисусе, всех любяй и милуяй, собери во едино стадо вся заблудшия овцы!
   Иисусе, мир всем подавали, утоли зависть и пререкание между призывающими имя Твое; Иисусе, причащаяй мя самого Тела и Крови Твоея, да буду воистину плоть от плоти и кость от костей Твоих!
   Иисусе, Боже сердца моего, прииди и соедини мя с Тобою на веки!
    Кондак 10
   На вечери, в Кане Галилейстей, воду в вино претворив, первое сим знамение Божественныя силы Твоея показал еси. Отходя же на крест, яко жених душ, последнее чудо любве верующим в Тя явил еси, претворив хлеб в Тело Твое и вино в Кровь Твою, имиже насыщался и аз в живот вечный, благодарне зову Ти: Аллилуиа!
    Икос 10
   В день воскресения Твоего, двою от ученик Твоих спутешествуя во образе странника в Еммаус, поучал еси их о тайне страданий Твоих: онема же держастася очи, да Тя не познаста, аще и сердце их горя бе в них от сладости словес Твоих. Егда же преклонься на моление их, вшел еси с ними облещи и, благословив хлеб, подал еси им: абие отверзостася има очи, да Тя познаста. Подобясь сим ученикам, дерзаю и аз со смирением вознести к Тебе сицевый глас:
   Иисусе долготерпеливый, не остави и мене единаго на пути жизни за скудость веры моея; Иисусе, научи мя, якоже и онех, разумети пророчествия о Тебе и тайну благодатнаго соединения с Тобою!
   Иисусе, согрей и воспламени, якоже онех учеников, и мое хладное сердце; Иисусе преблагий, облязи и со мною, яко уже преклонился есть к вечеру день моея жизни!
   Иисусе, даждь ми познати Тя воистину в настоящем преломлении таинственнаго хлеба и в питии от чаши; Иисусе, сотвори, да и аз, познав силу любве Твоея, буду провозвестником оныя для братий моих!
   Иисусе, Боже сердца моего, прииди и соедини мя с Тобою на веки!
    Кондак 11
   Побеждающему обещал еси дати ясти от древа животнаго, еже есть посреди рая Божия, и от манны сокровенныя. К сему вкушению на небеси, да будет ми приуготовлением на земли причащение Тела и Крови Твоея, к нему же аз, недостойный, ныне приступая, зову: Аллилуиа!
    Икос 11
   Ядый и пияй недостойне, суд себе яст и пиет, не разсуждаяй Тела и Крови Господни, вразумляет приступающих к причащению небошественный Павел: тем же и аз страшусь и трепещу своего недостоинства; но да не надолзе удалялся Твоего общения, от мысленнаго волка звероуловлен буду, прихожду к Тебе со гласом таковым:
   Иисусе, приими мя, якоже приял еси мытаря, блудницу и разбойника; Иисусе, не возгнушайся внити под кров души моея, аще и весь пуст и палея есть!
   Иисусе, разверзи и моя душевныя очи, якоже разверз еси слепу от рождения; Иисусе, прорцы и мне, якоже оному разелабленному: востани и ходи!
   Иисусе, устави ток нечистых пожеланий души моея, якоже уставил еси токи жены кровоточивыя; Иисусе, уврачуй проказу души и совести моея!
   Иисусе, Боже сердца моего, прииди и соедини мя с Тобою на веки!
    Кондак 12
   Завистию диавбла, усты змия глаголавшаго, весь род человеческий вкушением от плода запрещеннаго рай погуби и смерти предадеся. Вкушением же от пречистаго Тела и Крови Твоея вси земнороднии паки вечныя сподобляются жизни и восходят на первое достояние. Врачевство бо от яда змиина и семя беземертия есть причащение животворящих Тайн Твоих: тем же благодарне зову Ти: Аллилуиа!
    Икос 12
   Се, пред сосудом с Божественными Тайнами Твоими предстою, злых же помышлений моих не отступаю; едина всемогущая благодать Твоя ободряет и привлекает мя: тем же, повергая себя в бездну милосердия Твоего, вопию:
   Иисусе, призываяй к покою в Тебе всех труждающихся и обремененных, приими и мене, утружденнаго суетою мира; Иисусе, пришедый призвати не праведныя, но грешныя на покаяние, разреши и мя от грехов и страстей моих!
   Иисусе, исцеляяй всякий недуг и всякую язву, уврачуй раны и гноение души моея; Иисусе, насыщали алчущия, насыти мя Телом и Кровию Твоею!
   Иисусе, воскрешали мертвыя, оживи мя, умершаго грехами; Иисусе, победителю ада, извлеки мя из челюстей духа злобы!
   Иисусе, Боже сердца моего, прииди и соедини мя с Тобою на веки!
    Кондак 13
   О пресладкий и всещедрый Иисусе, выну сходяй, яко манна с небесе, для питания душ и сердец наших в таинстве пречистаго Тела и Крови Твоея, сподоби мя неосужденно причаститися Божественных Тайн Твоих, да исцелен, насыщен, освящен и обожен Тобою на веки, благодарно зову Ти: Аллилуиа!
   Этот кондак читается трижды, затем Икос 1: «Ангела Твоего к провидцу...» и Кондак 1: «Избранный Женише...»

Информация о первоисточнике

При использовании материалов библиотеки ссылка на источник обязательна.
При публикации материалов в сети интернет обязательна гиперссылка:
"Православная энциклопедия «Азбука веры»." (http://azbyka.ru/).

Преобразование в форматы epub, mobi, fb2
"Православие и мир. Электронная библиотека" (lib.pravmir.ru).