Внутренний человек, в клети сердца своего уединеный, поучающийся и молящийся втайне

Предисловие

    «Согреяся сeрдце моe во мне, и в поучeнии моeм разгорится oгнь» (Пс.38:4)
   Понеже мнози суть в нас неве́дущии, что есть внутреннее человека Богомысленного дело, ниже́ что есть Богомысленность разумеющии, ни, о творимой умом молитве, что знающии, но мнящии яко теми токмо молитвами подобает молитися, яже написаны суть в церковных книгах, а о тайном в сердцы с Богом беседовании, и о происходящей оттуду пользе отнюд незнающии, ниже́ вкусившии когда духовной тоя сладости; и якоже слепорожденный о солнечномь сиянии токмо слышит, каково же есть сияние, того не весть; си́це тыи о Богомысленном поучении и молитве разве слышат, разумеши же не разумеют, и лишаются невежеством своим многих благ духовных, и остаются преспеяния добродетельного, на совершенное Богоугождение возводящего: того ради предлагаются зде малая некая ко внутреннему обучению, и к Богомысленной молитве наставления простых ради, да изволяяй начнет помалу наставлятися, Господу поспе[…]
   Внутреннего человека духовное обучение начинается от словес Христовых сих:
«Егда мо́лишися, вни́ди в клеть твою, и затворив дверь твою, помоли́ся Отцу твоему втайне» (Матф. VII6).

ГЛАВА 1. О сугубстве человека, обучения, молитвы и клети

   Сугуб есть человек, внешний и внутренний, плотян и духовен: внешний, плотяный, видимый есть; внутренний же, духовный, невидимый, но (по словеси Святаго Апостола Петра) «потае́ный се́рдца человек в неистлении кроткаго и молчаливаго духа» (1 Петр. IIII4); и Павел Святый сугубство человеческое изъявляет, глаголя: «аще внешний наш человек и тлеет, но внутренний обновляется» (2 Кор. IV:16). Се, внешнего и внутреннего человека быти яве сказует Апостол. Внешний убо человек от многих членов составляется; внутренний же умом, вниманием себе, страхом Господним, и благодатию Божиею в совершенство приходит. Внешнего человека дела́ яве бывают; внутреннего же человека не дове́дома суть, по Псаломнику: «присту́пит человек, и сердце глубоко́» (Псал. LXIIII7); и Апостол глаголет: «кто весть от человек, яже суть в человеце, точию дух человека, живущий в нем?» (1 Кор. III11) Един токмо испытуяй сердца́ и утробы весть вся тайны внутреннего человека.
   Сугубое и обучение есть, внешнее и внутреннее: внешнее в книгах, внутреннее в Богопомышлении; внешнее в любомудрии, внутреннее в Боголюбии; внешнее вь витийствованиях, внутреннее в молениях; внешнее в остроумии, внутреннее в теплоте духа; внешнее в художествах, внутреннее в помышлениях; внешний «разум кичит» (1Кор.8:1), внутренний же смиряется; внешний любопытствует, хотя ведати вся, внутренний же себе внимает, и ничтоже ино желает ведати кроме Бога, Давидски к Нему глаголя: «Тебе рече́ сердце мое: Го́спода взыщу; взыска́ Тебе лице мое, лица́ Твоего, Господи, взыщу» (Псал. XXVII8). И паки: «Имже образом желает елень на источники водныя: сице желает душа́ моя к Тебе, Боже» (Псал. XLII2).
   Сугубая и молитва, внешняя, и внутренняя, яве творимая, и втайне, соборная, и наедине бываемая, должная, и произвольная.
   Творимая яве, по уставу церковному должная, соборная молитва и́мать своя времена: полунощие, утреню, часы, Литургию, вечерню, повечерие, на которая моления и звоном призываются людие; должни бо та, яко подобающую дань Царю небесному на всяк день воздавати.
   Творимая же втайне, произвольная молитва бывает и безвременно, когда кто восхощет, никомуже зовущу, токмо самому́ подвижущу духу: оная церковная молитва и́мать число положенных Псалмов, тропарей и канонов, и прочих пений и действ Иерейских; сия же (тайная и произвольная) якоже безвременна, си́це и числом неопределяема есть, елико бо кто хощет, мо́лится, овогда кратко, овогда продолженне. Оная устнама и гласом вслух глаголется; сия же умом токмо. Оная стоя деется; сия же не токмо стоя или ходя, но и седя и на одре почивая, якоже когда случится возвести ум свой к Богу. Оная соборная творится в храме Господнем, в церкве, или по случаю в коем доме, а́може на то нецыи соберутся; сия же уединенная совершается в затворенной о себе клети, по словеси Господню: «егда́ мо́лишися, вни́ди в клеть твою, и затворив дверь твою, помолися Отцу твоему втайне» (Матф. VII6).
   Сугубая и клеть есть, внешняя и внутренняя, вещественная, глаголю, и духовная: вещественная от древа или камене, духовная же клеть, сердце или ум, или (по Святому Феофилакту) мысль тайная, все же то едино есть. Оная убо вещественная клеть на едином стои́т месте; сия же всюду с человеком обносится, гделибо человек есть, всегда внутрь его сердце его, в немже может умом своим, помышления своя собрав, затворитися и молитися втайне к Богу, а́ще и посреде людей сущи, и со многими беседующи: внутренняя бо молитва (случится ли кому посреде людей сущу к ней подвигнутися духом) ни устен требует, ни книги ищет, ни двизания языка употребляет, ни гортанного гласа, а́ще и в то на уединии происходит, но самого́ точию возведения ума к Богу и углубления в Онь, е́же на всяком месте делати возможно.
   Вещественная клеть единого человека, в ней безмолвствующего, затворяет; внутренняя же духовная вмещает в себе Бога и все Небесное Царство, Самому́ Христу во Евангелии глаголющу: «Царство Божие внутрь вас есть» (Лук. XVIII21), е́же в словесах Святого Макария Египетского изъясняется сих: „сердце сосуд мал есть, но в нем вмещаемы бывают вся вещи: тамо Бог, тамо Ангелы, тамо живот и Царство, тамо небесныи градове, тамо сокровища благодати“.
   В той убо внутренней, сердечной клети паче, неже между стенами затворятися часто человеку подобает, и собравши вся помышления своя, представляти ум свой Богу, и молитися к Нему втайне теплотою духа и верою живою, купно же и поучатися в Богомыслии, да возможет возрасти в мужа совершенна.

ГЛАВА 2. О молитве, согревающей человека, и в любовь с Богом соединяющей

   В первых ведати бу́ди сие, яко человеку Христианскому, (паче же лицу духовному по должности звания своего), подобает всячески о сем пещися выну, да соединится с Богом создателем, любителем, благодетелем, и крайним добро́м своим, от Негоже и к Немуже создан есть; ибо душе́, от Бога созданной, не иный центр (конечное место) есть, токмо Сам Бог, от Негоже бытие и естество и́мать, и в Немже ей жити вечно. Вся бо зримая на земли любезная и желательная, а́ще богатство, а́ще слава, а́ще жена, аще чада, кратко рекущи: вся красная и сладкая и любезная мира сего не суть естественна душе́, разве телу некая, и временна сущи, вскоре прейдут, яко сень; душе́ же, вечной сущей, несть где вечно упокоитися, токмо в едином вечном Бозе, яко в крайнем добре́ своем, паче всех красот и сладостей и люблений краснейшем, сладчайшем и любезнейшем, и естественном своем месте, отнюдуже произыде, и а́може паки и́мать возвратитися. Якоже бо плоть, от земли́ сущая, в землю: си́це душа́, от Бога сущая, к Богу возвращается, и у Него пребывает, на то бо и создана есть от Бога, да в Бозе пребудет во веки. Того ради зде во временной сей жизни соединения с Богом прилежно искати требе, да в будущей с Ним и в Нем вечно быти сподобится.
   Соединитися же с Ним не иным чим кто си́це может, якоже крайнею сердечною любовию; ибо и Евангельская грешная жена сего ради получи у Него велию грехопростительную милость, и крепкое с Ним соединение, «яко возлюби́ много» (Лук. VIII47). Он бо любящия Его любит, и прилепляющимся Ему прилепляется, и ищущим Его Себе представляет, и желающим насладитися любви Его, неоскудно подает сладость.
   Да возможет же человек таковую в сердце своем возбудити Божественную любовь, еюже бы ему с Богом соединитися, и связатися неразлучным любве союзом: требе часто моли́тися, возводящи ум свой к Богу: якоже бо дрова, огню часто прилагаемыя, умножают пламень: си́це молитва со углублением в Бозе ума часто творимая, возбуждает в сердце любовь Божественную, яже егда воспламенится, всего внутреннего человека согреет, и просветит и научит, безвестная и тайная премудрости Своея явит ему, и сотворит его, аки пламенноогненна Серафима, выну Богу предстояща духом, и умом Нань взирающа, и оттуду духовную почерпающа сладость.

ГЛАВА 3. Яко молитва, устнами глаголемая, умом же невнимаемая, ничтоже есть

   Не безместно же есть зде воспомянути некая неудобь разумительная, о творимой духом или умом молитве, Апостольская речения, и решение те%`м положити.
   В послании к Ефесеом Святый Апостол Павел советует молитися духом: «всякою, — рече́, — молитвою и молениемь молящеся на всякое время духом» (Еф. VII18): тойже Апостол в послании к Коринфяном глаголет: «дух мой мо́лится, а ум мой без плода есть» (1 Кор. XIV:14); ка%`ко убо то бывает, яко молящуся человеку духом, а ум остает безплоден?
    Отв. То речение, дух, от Святого Писания различне разумеется в человеце: овогда бо полагается вместо дыхания, овогда вместо самыя души́, овогда вместо какового желания и намерения доброго или злого, и вместо внутренния коея добродетели или недобродетели, якоже сие: дух смирения, дух любве, дух милосердия, и прочая; и сопротивно: дух гордыни, дух ненависти, дух сребролюбия, и прочая; овогда полагается дух вместо коего дарования Духа Святого, якоже дух премудрости, дух разума, дух прозорливства и прочая; овогда же емлется вместо самого́ ума, якоже в том же Апостоле пишется: «обновляйтеся, — рече́, — духом ума вашего» (Еф. IV:23).
   Егда убо советует Апостол Ефесяном, да молятся духом, полагает та́мо духа вместо самого́ ума, егоже моляйся человек должен вперити в Бога. Егда же и Коринфяном пишя, сказует духа молящася, ума же безплодна пребывающа, полагает на месте то%`м духа вместо дыхания человеческого и гла́са, аки глаголя к ним: кая вам польза, о Коринфяне! яко гласом токмо, от вашего дыхания происходящим, мо́литеся, а ум ваш молитве не внемлет, но ино нечто мечтает? Кая польза языком много глаголати, а умом не разумети глаголемых? Аще и тьмы словес языком возглаголеши, человече; аще и всею гортанию, елико дух твой может, воспоеши: егда ум твой не предстоит Богу, и не зрит Нань, но помышлениями инамо уклоняется, та молитва твоя никаковыя же тебе принесет корысти, не услышана будет от Бога, и без плода останет. До́бре то и Святый Киприан разсудил есть, глаголя: „ка́ко услышан быти от Бога желаеши, ты же сам себе не слышиши? хощещи, да Бог памятствует о тебе, егда молишися, ты же сам о тебе не помниши?“ До зде Киприан Святый. Дает убо Апостол Коринфяном, а при те%`х и всем нам себе во образ, глаголя: «помолюся духом, помолюся и умом: воспою духом, воспою же и умом» (1 Кор. XIV:15); егда, рече́, «молюся языком», и гласом от моего дыхания происходящим, должен есмь и умом молитися (1 Кор. XIV:14).

ГЛАВА 4. Яко краткая, часто же творимая молитва, полезнейша есть паче продолженныя

   Уведася от искусных в Богомыслии и о творимой умом от се́рдца молитве, яко теплейша и полезнейша бывает та%`, яже вкратце, часто же деется, паче продолженной: (аще и продолженная не без многия пользы бывает, но та в совершенных, а не в новоначинающих); в продолженной бо молитве ум, не у обыкшего в то%`м человека, не может долго предстояти Богу, но обычною непостоянства немощию побеждаяся, восхищается ко внешним, и теплота духа вскоре в нем устудевает, и бывает таковая молитва не молитва, но ума смущение, помышлениям семо и овамо того влекущим, е́же деется и в церковных соборных пениях, и в келейных многочтомых правилах. Краткая же, а частая молитва, постоятельнее; всему бо уму, на мал час углубившуся в Бозе, теплее совершатися может. Чесо ради и Господь рече́: «молящеся не лишше глаголите: ...не во многоглаголании бо услышаны будете» (Матф. 6:7). И Святый Иоанн Лествичник поучает: „не многословити начинай, да не ко взысканию словес разыдется ум. Едино слово мытарево Бога умилостиви, и един глагол верен разбойника спасе́; многословие убо многажды в молитве ум возмечта и разлия, единословие же множицею ум собрати возможе“. До зде Лествичник.
   Но речет кто%`: почто убо Апостол, к Солуняном пишя, глаголет: «непрестанно моли́теся» (1 Сол. V:17)?
    Отв. Обычно есть в Писании Святом дело, часто творимое, нарицати выну творимым, якоже се%`: «в первую скинию выну вхождаху Священницы, службы совершающе» (Евр. IX:6): си есть, по вся дни во уставленныи на то часы, а не непрестанно, днию и нощию, часто, а не неисходно. Аще же и неисходно бяху Священницы в церкви, стрегуще огня, с небеси сшедшего, и прилагающе тому́ поленца, да не угаснет: обаче и то не вси купно творяху, но чредами пременяющеся, якоже и о Святом Захарии пишется: «бысть же служащу ему в чину чреды своея пред Богом» (Лук. II8). Подобне и о молитве, непрестанно от Апостола повелеваемой, разумети есть; не возможно бо человеку си́це пребывати в молитве, дабы от тоя днию и нощию непрестати: понеже и ко инем делам, и яже о нужных попечении и управлении своего дому, времяни требе есть: время делания, время беседования, время ядения и пития, время покоя и сна: ка́ко убо возможно будет молитися непрестанно? разве возможно часто молитися? часто же деемая молитва вменяется, яко непрестанно творимая. Частая убо, краткая же молитва твоя бу́ди без умножения излишних глаголов, якоже и Святыи отцы учат: Святый Феофилакт в толковании Матфеевом написа́, рекущи: не подобает продолжати молитвы, но часто, мало же глаголати. В Златоустого же на Апостольская Павлова послания беседах пишется си́це: иже лишше глаголет в молитве, не мо́лится, но празднословит. И паки Феофилакт на оном же Евангельском вышереченном месте глаголет: глаголание лишшее есть празднословие. До́бре Апостол рече́: «хощу пять словес умом моим глаголати, неже тьмы словес языком» (1 Кор. XIV:19); сиесть, уне ми краткую молитву к Богу сотворити со вниманием, неже безчисленная словеса глаголати без внимания, и воздух токмо словесы и гласом вотще исполняти.
   Еще же оная вышереченная Апостольская словеса: «непрестанно моли́теся» (1 Сол. V:17), разумети бу́ди о творимой умом молитве; ум бо может вперен быти выну в Бога, и молитися Ему непрестанно.
   Начни убо уже, о душе! помалу касатися намеренного ти обучения, начни же во имя Господне, по увещанию Апостола глаголющего: «все, е́же аще творите словом, или́ делом, или умом, вся во имя Го́спода Иисуса Христа» творите (Кол. IIII17): сиесть, творите, рече́, с добрым намерением, не толико своея, аще и духовныя, ищуще корысти, елико славы Божия, да во всех наших словесах, и делах, и помышлениях прославляется имя Го́спода Иисуса Христа Спа́са нашего.
   Но первее кратким толкованием изъясни себе, что есть молитва.
   Молитва есть обращение ума и помышлений к Богу: молитися есть предстояти умом своим Богу, и зрети Нань мыслию неуклонною, и беседовати к Нему́ со благоговейным страхом и упованием.
   Собери убо вся помышления твоя, и вся внешняя, житейская попечения отложив, представи ум твой Богу, и зри Нань.

Информация о первоисточнике

При использовании материалов библиотеки ссылка на источник обязательна.
При публикации материалов в сети интернет обязательна гиперссылка:
"Православная энциклопедия «Азбука веры»." (http://azbyka.ru/).

Преобразование в форматы epub, mobi, fb2
"Православие и мир. Электронная библиотека" (lib.pravmir.ru).