Ектения великая
Диакон: Миром Господу помолимся.
Хор: Господи, помилуй. (На каждое прошение) Тебе, Господи. Аминь.
Первый изобразительный антифон
Благослови, душе моя, Господа. Благословен еси, Господи. Благослови, душе моя, Господа, и вся внутренняя моя Имя святое Его.
Благослови, душе моя, Господа, и не забывай всех воздаяний Его.
Очищающаго вся беззакония твоя, исцеляющаго вся недуги твоя.
Избавляющаго от истления живот твой, венчающаго тя милостию и щедротами.
Исполняющаго во благих желание твое: обновится, яко орля, юность твоя.
Щедр и милостив Господь, долготерпелив и многомилостив.
Благослови, душе моя, Господа, и вся внутренняя моя Имя святое Его. Благословен еси, Господи.
Ектения малая
Диакон: Паки и паки, миром Господу помолимся.
Хор: Господи, помилуй. (На каждое прошение) Тебе, Господи. Аминь.
Второй изобразительный антифон
Хвали, душе моя, Господа. Восхвалю Господа в животе моем,
пою Богу моему, дондеже есмь.
Не надейтеся на князи, на сыны человеческия, в нихже несть спасения.
Изыдет дух его, и возвратится в землю свою: в той день погибнут вся помышления его.
Блажен, емуже Бог Иаковль помощник его, упование его на Господа
Бога своего.
Сотворшаго небо и землю, море и вся, яже в них.
Хранящаго истину в век, творящаго суд обидимым, дающаго пищу алчущим.
Господь решит окованныя, Господь умудряет слепцы.
Господь возводит низверженныя, Господь любит праведники.
Господь хранит пришельцы, сира и вдову приимет, и путь грешных погубит.
Воцарится Господь во век, Бог твой, Сионе, в род и род.
Песнь Господу Иисусу Христу
Слава Отцу и Сыну и Святому Духу.
И ныне и присно и во веки веков. Аминь.
Единородный Сыне и Слове Божий, Безсмертен Сый и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся, распныйся же, Христе Боже, смертию смерть поправый, Един Сый Святыя Троицы, спрославляемый Отцу и Святому Духу, спаси нас.
Ектения малая
Диакон: Паки и паки, миром Господу помолимся.
Хор: Господи, помилуй. (На каждое прошение) Тебе, Господи. Аминь.
Третий изобразительный антифон. Блаженны
Во Царствии Твоем помяни нас, Господи, егда приидеши,
во Царствии Твоем.
Блажени нищии духом, яко тех есть Царство Небесное.
Блажени плачущии, яко тии утешатся.
Блажени кротции, яко тии наследят землю.
Блажени алчущии и жаждущии правды, яко тии насытятся.
Блажени милостивии, яко тии помиловани будут.
Блажени чистии сердцем, яко тии Бога узрят.
Блажени миротворцы, яко тии сынове Божии нарекутся.
Блажени изгнани правды ради, яко тех есть Царство Небесное.
Блажени есте, егда поносят вам, и изженут, и рекут всяк зол
глагол на вы, лжуще Мене ради.
Радуйтеся и веселитеся, яко мзда ваша многа на Небесех.
Малый вход с Евангелием
Иерей: Премудрость, прости.
Входное
Хор: Приидите, поклонимся и припадем ко Христу. Спаси ны, Сыне Божий, Во святых дивен Сый, поющия Ти, аллилуиа. Единожды.
Хор поет тропари и кондаки по Уставу.
Тропари всем Святым, и за умерших, глас 2
Апостоли, мученицы и пророцы, / святителие, преподобнии и праведнии, / добре подвиг совершившии и веру соблюдшии, / дерзновение имуще ко Спасу, / о нас Того, яко Блага, молите, // спастися, молимся, душам нашим.
Слава Отцу и Сыну и Святому Духу:
Тропари и кондаки святого дня
Кондак, глас 6
Со святыми упокой, / Христе, души раб Твоих, / идеже несть болезнь, ни печаль, ни воздыхание, // но жизнь безконечная.
И ныне и присно и во веки веков аминь:
Кондак, глас 8
Яко начатки естества Насадителю твари, / вселенная приносит Ти, Господи, богоносныя мученики; / тех молитвами в мире глубоце / Церковь Твою, жительство Твое, // Богородицею соблюди, Многомилостиве.
Тропарь храма прав. Иоанна Кронштадтского, глас 1
Православныя веры поборниче. / Земли Российския печальниче, / пастырем правило и образе верным, / покаяния и жизни во Христе проповедниче. / Божественных таин благоговейный служителю /
и дерзновенный о людех молитвенниче, / отче праведный Иоанне, / целителю и предивный чудотворче, /граду Кронштадту похвало / и церкви нашея украшение, / моли всеблагаго Бога // умирити мир и спасти души наша.
Кондак храма прав. Иоанна Кронштадтского, глас 3
Днесь пастырь Кронштадтский/ предстоит Престолу Божию/ и усердно молит о верных/ Христа Пастыреначальника,/ обетование давшаго:/ созижду Церковь Мою, // и врата адова не одолеют ей.
Кондак, глас 6-й
Предстательство христиан непостыдное, / ходатайство ко Творцу непреложное, / не презри грешных молений гласы, / но предвари, яко Благая, на помощь нас, верно зовущих Ти; / ускори на молитву
и потщися на умоление, // предстательствующи присно, Богородице, чтущих Тя.
Диакон: Господу помолимся.
Хор: Господи, помилуй.
Господи, спаси благочестивые и услыши ны. Аминь.
Трисвятое
Хор: Святый Боже, Святый Крепкий, Святый Безсмертный,
помилуй нас. (3 раза)
Слава Отцу и Сыну и Святому Духу, и ныне и присно и во веки веков. Аминь.
Святый Безсмертный, помилуй нас.
Святый Боже, Святый Крепкий, Святый Безсмертный, помилуй нас.
Прокимны
Чтение Апостола
Аллилуарии
Иерей: Мир всем.
Хор: И духови твоему.
Диакон: От (имярек) святаго Евангелия чтение.
Хор: Слава Тебе, Господи, слава Тебе.
Чтение Евангелия
Хор: Слава Тебе, Господи, слава Тебе.
Ектения сугубая
Хор: Господи, помилуй. (На каждое прошение)
Господи, помилуй. (Трижды на каждое прошение) Аминь.
Ектения об усопших
Хор: Господи, помилуй. (Трижды на каждое прошение) Подай, Господи. Господи, помилуй. Аминь.
Ектения об оглашенных
Хор: Господи, помилуй. (На каждое прошение) Тебе, Господи. Аминь.
Херувимская песнь
Иже Херувимы тайно образующе и животворящей Троице Трисвятую песнь припевающе, всякое ныне житейское отложим попечение.
Великий вход
Хор: Аминь.
Вторая часть Херувимския песни: Яко да Царя всех подымем, ангельскими невидимо дориносима чинми. Аллилуиа (трижды).
Ектения просительная
Хор: Господи, помилуй. (На каждое прошение)
Подай, Господи. Тебе, Господи. Аминь.
И Духови Твоему.
Отца и Сына и Святaго Духа, Троицу Единосущную и Нераздельную.
Символ веры
Верую во единаго Бога Отца Вседержителя, Творца небу и земли, видимым же всем и невидимым.
И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век. Света от Света, Бога истинна от Бога истинна, рожденна, несотворенна, единосущна Отцу, Имже вся быша.
Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася.
Распятаго же за ны при Понтийстем Пилате, и страдавша, и погребенна.
И воскресшаго в третий день по Писанием.
И возшедшаго на небеса, и седяща одесную Отца.
И паки грядущаго со славою судити живым и мертвым, Егоже Царствию не будет конца.
И в Духа Святаго, Господа, Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки.
Во едину Святую, Соборную и Апостольскую Церковь.
Исповедую едино крещение во оставление грехов.
Чаю воскресения мертвых,
и жизни будущаго века. Аминь.
Святое Возношение
Диакон: Станем добре, станем со страхом, вонмем, святое
возношение в мире приносити.
Хор: Милость мира, жертву хваления.
Иерей: Благодать Господа нашего Иисуса Христа, и любы Бога и Отца, и причастие Святаго Духа, буди со всеми вами.
Хор: И со духом твоим.
Иерей: Горе имеим сердца.
Хор: Имамы ко Господу.
Иерей: Благодарим Господа.
Хор: Достойно и праведно есть покланятися Отцу и Сыну, и Святому Духу, Троице Единосущней и Нераздельней.
Возглас: Победную песнь поюще, вопиюще, взывающе и глаголюще.
Хор: Свят, свят, свят Господь Саваоф, исполнь небо и земля славы Твоея; осанна в вышних, благословен Грядый во имя Господне, осанна в вышних.
Возглас: Приимите, ядите, сие есть Тело Мое, еже за вы ломимое во оставление грехов.
Хор: Аминь.
Возглас: Пийте от нея вси, сия есть Кровь Моя Новаго Завета, яже за вы и за многия изливаемая, во оставление грехов.
Хор: Аминь.
Возглас: Твоя от Твоих Тебе приносяще, о всех и за вся.
Хор: Тебе поем, Тебе благословим, Тебе благодарим, Господи, и молим Ти ся, Боже наш.
Иерей: Изрядно о Пресвятей, Пречистей, Преблагословенней,
Славней Владычице нашей Богородице и Приснодеве Марии.
Хор: Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога cлова рождшую, сущую Богородицу Тя величаем.
Отче наш
Отче наш, Иже еси на небесех, да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Хор: Един свят, един Господь, Иисус Христос, во славу Бога Отца. Аминь.
Причастны (в субботу)
Хор: Радуйтеся, праведнии о Господе, правым подобает похвала.
Многолетие
Хор: Великого Господина и Отца нашего Кирилла, Святейшего
Патриарха Московского и всея Руси, /
и Господина нашего Высокопреосвященнейшаго Феофана, архиепископа Берлинского и Германского,/
богохранимые страны наша,/
настоятеля, братию и прихожан святаго храма сего и вся православныя христианы,//
Господи, сохрани их на многая лета.
Запричастный концерт
Молитву пролию
Молитву пролию ко Господу и Тому возвещу печали моя, яко зол душа моя исполнися и живот мой аду приближися, и молюся, яко Иона: от тли, Боже, возведи мя.
В память вечную
В память вечную будет праведник, в память вечную будет праведник, в память вечную будет праведник от слуха зла не убоится. Аллилуиа.
Под твою милость
Под Твою милость прибегаем, Богородице Дево, молений наших не презри в скорбех, но от бед избави нас, Едина чистая и благословенная. Аминь. Пресвятая Богородице, спаси нас.
Царице моя преблагая
Царице моя преблагая, надеждо моя Богородице,
приятелище сирых и странных предстательница,
скорбящих радосте, обидимым покровительнице!
Зриши мою беду, зриши мою скорбь,
помози ми яко немощну, окорми мя яко странна.
Обиду мою веси, разреши ту, яко волиши:
яко не имам иныя помощи разве Тебе,
ни иныя предстательницы,
ни благия утешительницы, токмо Тебе, о Богомати,
яко да сохраниши мя и покрыеши во веки веков. Аминь.
Псалом 41
Имже образом желает елень на источники водныя, сице желает душа моя к Тебе, Боже. Возжада душа моя к Богу Крепкому, Живому: когда прииду и явлюся лицу Божию? Быша слезы моя мне хлеб день и нощь, внегда глаголатися мне на всяк день: где есть Бог твой? Сия помянух и излиях на мя душу мою, яко пройду в место селения дивна, даже до дому Божия, во гласе радования и исповедания шума празднующаго. Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего, и Бог мой. Ко мне самому душа моя смятеся: сего ради помянух Тя от земли Иордански и Ермониимски, от горы малыя. Бездна бездну призывает во гласе хлябий Твоих, вся высоты Твоя и волны Твоя на мне преидоша. В день заповесть Господь милость Свою, и нощию песнь Его от мене, молитва Богу живота моего. Реку Богу: Заступник мой еси, почто мя забыл еси? И вскую сетуя хожду, внегда оскорбляет враг? Внегда сокрушатися костем моим, поношаху ми врази мои, внегда глаголати им мне на всяк день: где есть Бог твой? Вскую прискорбна еси, душе моя? И вскую смущаеши мя? Уповай на Бога, яко исповемся Ему, спасение лица моего, и Бог мой.
Причащение мирян
Хор: Благословен грядый во имя Господне. Бог и Господь и явися
нам.
Хор: Тело Христово приимите, Источника Безсмертнаго вкусите.
Аллилуиа (трижды).
Хор: Видехом свет истинный, прияхом Духа Небеснаго, обретохом веру истинную, нераздельней Троице покланяемся, Та бо нас спасла есть.
Хор: Да исполнятся уста наша хваления Твоего Господи, яко да
поем славу Твою, яко сподобил еси нас причаститися Святым
Твоим, Божественным, безсмертным и животворящим Тайнам,
соблюди нас во Твоей святыни весь день поучатися правде Твоей. Аллилуиа, аллилуиа, аллилуиа.
Ектения малая
Диакон: Паки и паки, миром Господу помолимся.
Хор: Господи, помилуй. (На каждое прошение) Тебе, Господи. Аминь.
Иерей: Заамвонная молитва.
Хор: Буди имя Господне благословенно отныне и до века (трижды).
Псалом 33
Благословлю Господа на всякое время, выну хвала Его во устех моих.
О Господе похвалится душа моя, да услышат кротцыи и возвеселятся.
Возвеличите Господа со мною, и вознесем имя Его вкупе.
Взысках Господа, и услыша мя, и от всех скорбей моих избави мя.
Приступите к Нему, и просветитеся, и лица ваша не постыдятся.
Сей нищий воззва, и Господь услыша и, и от всех скорбей его спасе и.
Ополчится Ангел Господень окрест боящихся Его, и избавит их.
Вкусите и видите, яко Благ Господь: блажен муж, иже уповает Нань.
Бойтеся Господа, вси святии Его, яко несть лишения боящимся Его.
Богатии обнищаша и взалкаша: взыскающии же Господа не лишатся всякаго блага.
Хор: Слава Отцу и Сыну и Святому Духу.
И ныне и присно и во веки веков. Аминь.
Господи, помилуй (3 раза). Благослови.
Многолетие
Хор: Великого Господина и Отца нашего Кирилла, Святейшего
Патриарха Московского и всея Руси, /
и Господина нашего Высокопреосвященнейшаго Феофана, архиепископа Берлинского и Германского,/
богохранимые страны наша,/
настоятеля, братию и прихожан святаго храма сего и вся православныя христианы,//
Господи, сохрани их на многая лета.
Информация о первоисточнике
Публикация храма св. прав. Иоанна Кронштадтского в Гамбурге
http://www.hamburg-hram.de/letopis/tekst-bozhestvennoj-liturgii/8958.html
"Православие и мир. Электронная библиотека" (lib.pravmir.ru).
Дорогие братья и сестры!
Мы решили поместить на сайте текст Божественной Литургии, который выдается у нас на Литургии в субботу, для того, чтобы все присутствующие могли петь и следить за службой.
Вместе с тем, для лучшего понимания богослужения, предлагаем Вашему вниманию текст Литургии с параллельным переводом на русский язык. Здесь Вы найдете не только известные уже Вам песнопения и молитвы, но и те молитвы, которые читает священник в алтаре. Важно познакомиться с ними.
http://azbyka.ru/bogosluzhenie/liturgiya/lit02.shtml
Хочу в этом разделе о Божественной Литургии направить Вас к прекрасному фоторепортажу с комментариями священника Константина Пархоменко. Божественная Литургия: шаг за шагом.
http://azbyka.ru/parkhomenko/foto/index.php?act=viewfotoreport&id=195
Текст Литургии параллельно на славянском и немецком:
http://orthodoxinfo.de/index.
Господь да поможет нас исполнить рекомендацию пророка Давида.
«пойте Богу нашему, пойте разумно» (Пс.46:7–8)
Протоиерей Сергий Бабурин
© Онлайн библиотека сайта Православие и мир, 2011–2024
