1/14 сентября
Новолетие
Тропарь, глас 2-й
Всея твари Содетелю, времена и лета во Своей власти положивый, благослови венец лета благости Твоея, Господи, сохраняя в мире люди и град Твой, молитвами Богородицы, и спаси ны.
Кондак, глас 2-й
В вышних живый, Христе Царю, всех видимых и невидимых Творче и Зиждителю, Иже дни и нощи, времена и лета сотворивый, благослови ныне венец лета: соблюди и сохрани в мире град и люди Твоя, Многомилостиве.
8/21 сентября
Рождество Пресвятой Богородицы
Тропарь, глас 4-й
Рождество Твое, Богородице Дево, радость возвести всей вселенней: из Тебе бо возсия солнце правды, Христос Бог наш, и разрушив клятву, даде благословение, и упразднив смерть, дарова нам живот вечный.
Кондак, глас 4-й
Иоаким и Анна поношения безчадства, и Адам и Ева от тли смертныя свободистася, Пречистая, во святем рождестве Твоем. То празднуют и людие Твои, вины прегрешений избавльшеся, внегда звати Ти: неплоды раждает Богородицу и питательницу жизни нашея.
Величание
Величаем Тя, Пресвятая Дево, и чтим святых Твоих родителей, и всеславное славим рождество Твое.
Задостойник, глас 8-й
Чужде матерем девство, и странно Девам деторождение; на Тебе, Богородице, обоя устроишася. Тем Тя вся племена земная непрестанно величаем.
14/27 сентября
Воздвижение Честного
и Животворящего Креста
Тропарь, глас 1-й
Спаси, Господи, люди Твоя, и благослови достояние Твое, победы на сопротивныя даруя, и Твое сохраняя Крестом Твоим жительство.
Кондак, глас 4-й
Вознесыйся на Крест волею, тезоименитому Твоему новому жительству щедроты Твоя даруй, Христе Боже, возвесели нас силою Твоею, победы дая нам на супостаты, пособие имущим Твое, оружие мира, непобедимую победу.
Величание
Величаем Тя, Живодавче Христе, и чтим Крест Твой святый, имже нас спасл еси от работы вражия.
Задостойник, глас 8-й
Таин еси, Богородице, рай, невозделанно возрастивший Христа, Имже Крестное живоносное на земли насадися древо. Тем ныне возносиму, покланяющеся ему, Тя величаем.
25 сентября/8 октября
Преподобного Сергия Радонежского
Тропарь, глас 4-й
Иже добродетелей подвижник, яко истинный воин Христа Бога, на страсти вельми подвизался еси в жизни временней, в пениих, бдениих же и пощениих образ быв твоим учеником. Темже и вселися в тя Пресвятый Дух, Егоже действием светло украшен еси; но яко имея дерзновение ко Святей Троице, поминай стадо, еже собрал еси мудре, и не забуди, якоже обещался еси, посещая чад твоих, Сергие, Преподобне отче наш.
Кондак, глас 8-й
Христовою любовию уязвився, Преподобне, и Тому невозвратным желанием последовав, всякое наслаждение плотское возненавидел еси, и яко солнце Отечеству твоему возсиял еси, тем и Христос даром чудес обогати тя. Поминай нас чтущих пресветлую память твою, да зовем ти: радуйся, Сергие богомудре.
Величание
Ублажаем тя, преподобне отче Сергие, и чтим святую память твою, наставниче монахов и собеседниче Ангелов.
26 сентября/9 октября
Преставление святого апостола
и евангелиста Иоанна Богослова
Тропарь, глас 2-й
Апостоле, Христу Богу возлюбленне, ускори избавити люди безответны, приемлет тя припадающа Иже падша на перси приемый, Егоже моли, Богослове, и належащую мглу языков разгнати, прося нам мира и велия милости.
Кондак, глас 2-й
Величия твоя, девственниче, кто повесть? Точиши бо чудеса, и изливаеши исцеления, и молишися о душах наших, яко Богослов и друг Христов.
Величание
Величаем тя, апостоле Христов и евангелисте Иоанне Богослове, и чтим болезни и труды твоя, имиже трудился еси во благовестии Христове.
1/14 октября
Покров Пресвятой Богородицы
Тропарь, глас 4-й
Днесь благовернии людие светло празднуем, осеняеми Твоим, Богомати, пришествием, и к Твоему взирающе пречистому образу, умильно глаголем: покрый нас честным Твоим покровом, и избави нас от всякаго зла, молящи Сына Твоего Христа Бога нашего, спасти души наша.
Кондак, глас 3-й
Дева днесь предстоит в церкви, и с лики святых невидимо за ны молится Богу: Ангели со архиереи покланяются, апостоли же со пророки ликовствуют: нас бо ради молит Богородица Превечнаго Бога.
Величание
Величаем Тя, Пресвятая Дево, и чтим Покров Твой честный: Тя бо виде святый Андрей на воздусе, за ны Христу молящуюся.
5/18 октября
Святителей Московских: Петра, Алексия,
Ионы, Филиппа и Ермогена
Тропарь, глас 4-й
Первопрестольницы Российстии, истиннии хранителие апостольских преданий, столпи непоколебимии, Православия наставницы, Петре, Алексие, Ионо, Филиппе и Ермогене, Владыку всех молите, мир вселенней даровати и душам нашим велию милость.
Кондак, глас 3-й
Во святителех благочестно пожисте, и люди к богоразумию настависте, и добре Богу угодисте; сего ради от Него нетлением и чудесы прославистеся, яко ученицы Божия благодати.
Величание
Величаем вас, святителие Христовы Петре, Алексие, Ионо, Филиппе и Ермогене, и чтим святую память вашу: вы бо молите за нас Христа Бога нашего.
6/19 октября
Святого апостола Фомы
Тропарь, глас 2-й
Ученик Христов быв, божественнаго собора апостолькаго сопричастник, неверствием бо Христово Воскресение известив и Того пречистую страсть осязанием уверив, Фомо всехвальне, и ныне нам проси мира и велия милости.
Кондак, глас 4-й
Премудрости благодати исполнен, Христов апостол и служитель истинный в покаянии вопияше Тебе: Ты мой еси Бог же и Господь.
Величание
Величаем тя, апостоле Христов Фомо, и чтим болезни и труды твоя, имиже трудился еси во благовестии Христове.
10/23 октября
Преподобного Амвросия Оптинского
Тропарь, глас 5-й
Яко к целебному источнику, притекаем к тебе, Амвросие отче наш, ты бо на путь спасения нас верно наставляеши, молитвами от бед и напастей охраняеши, в телесных и душевных скорбех утешаеши, паче же смирению, терпению и любви научаеши, моли Человеколюбца Христа и Заступницу усердную спастися душам нашим.
Кондак, глас 2-й
Завет Пастыреначальника исполнив, старчества благодать наследовал еси, болезнуя сердцем о всех, с верою притекающих к тебе, темже и мы, чада твоя, с любовию вопием ти: отче святый Амвросие, моли Христа Бога, спастися душам нашим.
Величание
Ублажаем тя, преподобне отче Амвросие, и чтим святую память твою, наставниче монахов и собеседниче Ангелов.
18/31 октября
Святого апостола и евангелиста Луки
Тропарь, глас 5-й
Апостольских деяний сказателя, и Евангелия Христова светла списателя, Луку препетаго, славна суща Христове Церкви, песньми священными святаго апостола похвалим, яко врача суща человеческия немощи, естества недуги, и язи душ исцеляюща, и молящася непрестанно за души наша.
Кондак, глас 6-й
Истиннаго благочестия проповедника, и таин неизреченных ритора, звезду церковную, Луку божественнаго восхвалим: Слово бо его избра, с Павлом, мудрым, языков учителя, Един Ведый сердечная.
Величание
Величаем тя, апостоле и евангелисте Христов Луко, и чтим болезни и труды твоя, имиже трудился еси во благовестии Христове.
8/21 ноября
Собор Архистратига Михаила
и прочих Небесных сил бесплотных
Тропарь, глас 4-й
Небесных воинств Архистратизи, молим вас присно мы недостойнии, да вашими молитвами оградите нас кровом крил невещественныя вашея славы, сохраняюще ны, припадающия прилежно и вопиющия: от бед избавите ны, яко чиноначальницы Вышних сил.
Кондак, глас 2-й
Архистратизи Божии, служителие Божественныя славы, Ангелов начальницы и человеков наставницы, полезное нам просите и велию милость, яко безплотных Архистратизи.
Величание
Величаем вас, Архангели и Ангели и вся воинства, Херувими и Серафими, славящия Господа.
13/26 ноября
Святителя Иоанна Златоуста
Тропарь, глас 8-й.
Уст твоих, якоже светлость огня, возсиявши благодать, вселенную просвети; не сребролюбия мирови сокровища сниска, высоту нам смиренномудрия показа. Но твоими словесы наказуя, отче Иоанне Златоусте, моли Слова Христа Бога, спастися душам нашим.
Кондак, глас 6-й
От небес приял еси Божественную благодать, и твоими устнами вся учиши покланятися в Троице Единому Богу, Иоанне Златоусте всеблаженне, преподобне, достойно хвалим тя: еси бо наставник, яко Божественная являя.
Величание
Величаем тя, святителю отче Иоанне, и чтим святую память твою, ты бо молиши за нас Христа Бога нашего.
16/29 ноября
Святого апостола
и евангелиста Матфея
Тропарь, глас 3-й
Усердно от мытницы ко звавшему Владыце Христу, явльшуся на земли человеком за благость, Тому последовав, апостол избранный явился еси, и благовестник Евангелия вселенней велегласен. Сего ради чтим честную память твою, Матфее богоглаголиве: моли милостиваго Бога, да грехов оставление подаст душам нашим.
Кондак, глас 4-й
Мытарства иго отверг, правды игу припряглся еси и явился еси купец всеизряднейший, богатство принес, юже с высоты премудрость. Отонудуже проповедал еси истины слово и унылых воздвигл еси души, написав Час судный.
Величание
Величаем тя, апостоле и евангелисте Христов Матфее, и чтим болезни и труды твоя, имиже трудился еси во благовестии Христове.
21 ноября/4 декабря
Введение во храм Пресвятой Богородицы
Тропарь, глас 4-й
Днесь благоволения Божия предображение, и человеков спасения проповедание, в храме Божии ясно Дева является, и Христа всем предвозвещает, Той и мы велегласно возопиим: радуйся, смотрения Зиждителева исполнение.
Кондак, глас 4-й
Пречистый храм Спасов, многоценный чертог и Дева, священное сокровище славы Божия, днесь вводится в дом Господень, благодать совводящи, яже в Дусе Божественном, Юже воспевают Ангели Божии: Сия есть селение небесное.
Величание
Величаем Тя, Пресвятая Дево, Богоизбранная Отроковице, и чтим еже в храм Господень вхождение Твое.
Задостойник, глас 4-й
Яко одушевленному Божию кивоту, да никакоже коснется рука скверных, устне же верных Богородице немолчно глас Ангела воспевающе, с радостию да вопиют: истинно вышши всех еси, Дево Чистая.
23 ноября/6 декабря
Святого благоверного князя
Александра Невского
Тропарь, глас 4-й
Яко благочестиваго корене пречестная отрасль был еси, блаженне Александре, яви бо тя Христос, яко некое Божественное сокровище Российстей земли, новаго чудотворца, преславна и Богоприятна. И днесь сошедшеся в память твою верою и любовию, во псалмех и пениих радующеся славим Господа, давшего тебе благодать исцелений, Егоже моли спасти град сей, и стране нашей Богоугодней быти, и сыновом Российским спастися.
Кондак, глас 8-й
Яко звезду тя пресветлую почитаем, от востока возсиявшую и на запад пришедшую: всю бо страну сию чудесы и добротою обогащаеши, и просвещаеши верою чтущия память твою, Александре блаженне. Сего ради днесь празднуем твое успение, людие твои сущии, моли спасти отечество твое, и вся притекающия к раце мощей твоих, и верно вопиющия ти: радуйся, граду нашему утверждение.
Величание
Величаем тя, святый благоверный княже Александре, и чтим святую память твою, ты бо молиши за нас Христа Бога нашего.
24 ноября/7 декабря
Святой великомученицы Екатерины
Тропарь, глас 4-й
Добродетельми, яко лучами солнечными, просветила еси неверныя мудрецы и, якоже пресветлая луна ходящим в нощи, неверия тьму отгнала еси и царицу уверила еси, вкупе же и мучителя обличила еси, богозванная невесто, блаженная Екатерино. Желанием востекла еси в Небесный Чертог к прекрасному Жениху Христу и от Него царским венцем венчалася еси. Емуже со Ангелы предстоящи, за ны молися, творящия пречестную память твою.
Кондак, глас 2-й
Лик честный божественне, мучениколюбцы, воздвигните ныне, почитающе всемудрую Екатерину: сия бо в тризнищи Христа проповеда и змия попра, риторов разумы укротивши.
Величание
Величаем тя, страстотерпице Христова Екатерино, и чтим честное страдание твое, еже за Христа претерпела еси.
30 ноября/13 декабря
Святого апостола Андрея Первозванного
Тропарь, глас 4-й
Яко апостолов первозванный и верховнаго сущий брат, Владыце всех, Андрее, молися, мир вселенней даровати и душам нашим велию милость.
Кондак, глас 2-й
Мужества тезоименитаго богоглагольника и Церкве возследователя верховнаго, Петрова сродника восхвалим, зане якоже древле сему, и ныне нам воззва: приидите, обретохом Желаемаго.
Величание
Величаем тя, апостоле Христов Андрее, и чтим болезни и труды твоя, имиже трудился еси во благовестии Христове.
6/19 декабря
Святителя Николая,
архиепископа Мирликийского, чудотворца
Тропарь, глас 4-й
Правило веры и образ кротости, воздержания учителя яви тя стаду твоему, яже вещей истина. Сего ради стяжал еси смирением высокая, нищетою богатая: отче священноначальниче Николае, моли Христа Бога, спастися душам нашим.
Кондак, глас 3-й
В Мирех, святе, священнодействитель показался еси, Христово бо, преподобне, Евангелие исполнив, положил еси душу твою о людех твоих, и спасл еси неповинныя от смерти. Сего ради освятился еси, яко великий таинник Божия благодати.
Величание
Величаем тя, святителю отче Николае, и чтим святую память твою, ты бо молиши за нас Христа Бога нашего.
12/25 декабря
Святителя Спиридона,
епископа Тримифунтского, чудотворца
Тропарь, глас 4-й
Собора Перваго показался еси поборник и чудотворец, богоносе Спиридоне, отче наш. Темже мертву ты во гробе возгласив, и змию в злато претворил еси, и внегда пети тебе святыя молитвы Ангелы, сослужащия тебе, имел еси, священнейший. Слава Давшему тебе крепость, слава Венчавшему тя, слава Действующему тобою всем исцеления.
Кондак, глас 2-й
Любовию Христовою уязвився, священнейший, ум вперив зарею Духа, детельным видением твоим деяние обрел еси, богоприятне, жертвенник Божественный быв, прося всем Божественнаго сияния.
Величание
Величаем тя, святителю отче Спиридоне, и чтим святую память твою, ты бо молиши за нас Христа Бога нашего.
20 декабря/2 января
Святого праведного Иоанна Кронштадтского,
чудотворца
Тропарь, глас 1-й
Православныя веры поборниче, земли Российския печальниче, пастырем правило и образе верным, покаяния и жизни во Христе проповедниче, Божественных Таин благоговейный служителю и дерзновенный о людех молитвенниче, отче праведный Иоанне, целителю и предивный чудотворче граду Кронштадту похвало и Церкве нашея украшение, моли Всеблагаго Бога умирити мир и спасти души наша.
Кондак, глас 3-й
Днесь пастырь Кронштадтский предстоит Престолу Божию и усердно молит о верных Христа Пастыреначальника, обетование давшаго: «Созижду Церковь Мою и врата адова не одолеют ей».
Величание
Величаем тя, святый праведный отче Иоанне, и чтим святую память твою, ты бо молиши за нас Христа Бога нашего.
21 декабря/3 января
Святителя Петра, митрополита Московского
Тропарь, глас 4-й
Яже прежде безплодная, земле, ныне веселися: се бо Христос светильника в тебе показа, яве сияюща в мире и исцелевающа недуги и болезни наша. Сего ради ликуй и веселися со дерзновением, святитель бо есть Вышняго, сия соделоваяй.
Кондак, глас 2-й
Взбранному и дивному нашея земли чудотворцу, днесь любовию к тебе притекаем, песнь, богоносе, плетуще. Яко имея дерзновение ко Господу, многообразных избави нас обстояний, да зовем ти: радуйся, утверждение граду нашему.
Величание
Величаем тя, святителю отче Петре, и чтим святую память твою, ты бо молиши за нас Христа Бога нашего.
25 декабря/7 января
Рождество Господа Бога
и Спаса нашего Иисуса Христа
Тропарь, глас 4-й
Рождество Твое, Христе Боже наш, возсия мирови свет разума: в нем бо звездам служащии, звездою учахуся Тебе кланятися Солнцу правды, и Тебе ведети с высоты Востока; Господи, слава Тебе.
Кондак, глас 3-й
Дева днесь Пресущественнаго раждает, и земля вертеп Неприступному приносит; Ангели с пастырьми славословят, волсви же со звездою путешествуют; нас бо ради родися Отроча младо, Превечный Бог.
Величание
Величаем Тя, Живодавче Христе, нас ради ныне плотию рождшагося от безневестныя и Пречистыя Девы Марии.
Задостойник, глас 1-й
Величай, душе моя, честнейшую и славнейшую горних воинств Деву Пречистую Богородицу.
Любити убо нам, яко безбедное страхом, удобее молчание, любовию же, Дево, песни ткати спротяженно сложенныя, неудобно есть: но и, Мати, силу, елико есть произволение, даждь.
1/14 января
Обрезание Господа нашего Иисуса Христа
и память святителя Василия Великого
Тропарь Обрезанию, глас 1-й
На престоле огнезрачнем в вышних седяй со Отцем Безначальным и Божественным Твоим Духом, благоволил еси родитися на земли от Отроковицы неискусомужныя Твоея Матере, Иисусе: сего ради и обрезан был еси яко человек осмодневный. Слава всеблагому Твоему совету; слава смотрению Твоему, слава снизхождению Твоему, Едине Человеколюбче.
Тропарь святителю, глас 1-й
Во всю землю изыде вещание твое, яко приемшую слово твое, имже боголепно научил еси, естество сущих уяснил еси, человеческия обычаи украсил еси, царское священие, отче преподобне: моли Христа Бога спастися душам нашим.
Кондак праздника, глас 3-й
Всех Господь обрезание терпит, и человеческая прегрешения яко благ обрезует, дает спасение днесь миру: радуется же в вышних и Создателев иерарх и светоносный, божественный таинник Христов Василий.
Кондак святителю, глас 4-й
Явился еси основание непоколебимое Церкве, подая всем некрадомое господство человеком, запечатлея твоими веленьми, небоявленне Василие преподобне.
Задостойник
О Тебе радуется, Благодатная, всякая тварь, Ангельский собор и человеческий род, освященный храме и раю словесный, девственная похвало, из Неяже Бог воплотися и младенец бысть, прежде век сый Бог наш: ложесна бо Твоя престол сотвори и чрево Твое пространнее небес содела. О Тебе радуется, Благодатная, всякая тварь, слава Тебе.
2/15 января, также 19 июля/1 августа
Преподобного Серафима Саровского
Тропарь, глас 4-й
От юности Христа возлюбил еси, блаженне, и Тому Единому работати пламенне вожделев, непрестанною молитвою и трудом в пустыни подвизался еси, умиленным же сердцем любовь Христову стяжав, избранник возлюблен Божия Матере явился еси. Сего ради вопием ти: спасай нас молитвами твоими, Серафиме, преподобне отче наш.
Кондак, глас 2-й
Мира красоту и яже в нем тленная оставив, преподобне, в Саровскую обитель вселился еси; и тамо ангельски пожив, многим путь был еси ко спасению; сего ради и Христос тебе, отче Серафиме, прослави, и даром исцелений и чудес обогати. Темже вопием ти: радуйся, Серафиме, преподобне отче наш.
Величание
Ублажаем тя, преподобне отче Серафиме, и чтим святую память твою, наставниче монахов и собеседниче Ангелов.
6/19 января
Крещение Господне. Богоявление
Тропарь, глас 1-й
Во Иордане крещающуся Тебе, Господи, Троическое явися поклонение: Родителев бо глас свидетельствовавше Тебе, возлюбленнаго Тя Сына именуя, и Дух в виде голубине, извествоваше словесе утверждение. Явлейся, Христе Боже, и мир просвещей, слава Тебе.
Кондак, глас 4-й
Явился еси днесь вселенней, и свет Твой, Господи, знаменася на нас, в разуме поющих Тя: пришел еси и явился еси Свет неприступный.
Величание
Величаем Тя, Живодавче Христе, нас ради ныне плотию крестившагося от Иоанна в водах Иорданских.
Задостойник, глас 2-й
Величай, душе моя, честнейшую горних воинств, Деву Пречистую Богородицу.
Недоумеет всяк язык благохвалити по достоянию, изумевает же ум и премирный пети Тя, Богородице; обаче Благая сущи, веру приими, ибо любовь веси Божественную нашу: Ты бо христиан еси предстательница, Тя величаем.
Тропари на водоосвящении, глас 8-й
Глас Господень на водах вопиет, глаголя: приидите, приимите вси Духа премудрости, Духа разума, Духа страха Божия, явльшагося Христа.
Днесь вод освящается естество, и разделяется Иордан, и своих вод возвращает струи, Владыку зря крещаема.
Яко человек на реку пришел еси, Христе Царю, и рабское крещение прияти тщишися, Блаже, от Предтечеву руку, грех ради наших, Человеколюбче.
Слава, и ныне: Ко гласу вопиющаго в пустыни, уготовайте путь Господень, пришел еси, Господи, зрак рабий приим, крещения прося, не ведый греха; видеша Тя воды и убояшася. Трепетен бысть Предтеча, и возопи глаголя: како просветит светильник Света, како руку положит раб на Владыку? Освяти мене и воды, Спасе, вземляй мира грех.
14/27 января
Святой равноапостольной Нины
Тропарь, глас 4-й
Слова Божия служительнице, во апостольстей проповеди первозванному Андрею и прочим апостолом подражавшая, просветительнице Иверии и Духа Святаго цевнице, святая равноапостольная Нино, моли Христа Бога, спастися душам нашим.
Кондак, глас 2-й
Приидите днесь вси, воспоим избранную от Христа равноапостольную проповедницу Божия Слова, мудрую благовестницу, люди Карталинии приведшу на путь живота и истины, Богоматере ученицу, усердную заступницу и неусыпающую хранительницу нашу, Нину прехвальную.
Величание
Величаем тя, святая равноапостольная Нино, всю страну Иверскую светом Евангелия просветившую и ко Христу приведшую.
24 января/6 февраля
Святой блаженной Ксении Петербургской
Тропарь, глас 1-й
Нищету Христову возлюбивши, безсмертныя трапезы ныне наслаждаешися, безумием мнимым безумие мира обличивши, смирением крестным силу Божию восприяла еси. Сего ради дар чудодейственныя помощи стяжавшая, Ксение блаженная, моли Христа Бога избавитися нам от всякаго зла покаянием.
Кондак, глас 3-й
Днесь светло ликует град святаго Петра, яко множество скорбящих обретают утешение, на твоя молитвы надеющеся, Ксение всеблаженная, ты бо еси граду сему похвала и утверждение.
Величание
Величаем тя, святая блаженная мати Ксение, и чтим святую память твою, ты бо молиши за нас Христа Бога нашего.
25 января/7 февраля
Святителя Григория Богослова,
архиепископа Константинопольского
Тропарь святителю, глас 1-й
Пастырская свирель богословия твоего риторов победи трубы, якоже бо глубины Духа изыскавшу и доброты вещания приложишася тебе. Но моли Христа Бога, отче Григорие, спастися душам нашим.
Кондак, глас 3-й
Богословным языком твоим сплетения риторская разрушивый, славне, Православия одеждею, свыше истканною, Церковь украсил еси, юже и носящи, с нами зовет твоими чады: радуйся, отче, богословия уме крайнейший.
27 января/9 февраля
Перенесение мощей
святителя Иоанна Златоуста
Тропарь, глас 8-й
Уст твоих, якоже светлость огня, возсиявши благодать, вселенную просвети; не сребролюбия мирови сокровища сниска, высоту нам смиренномудрия показа, но твоими словесы наказуя, отче Иоанне Златоусте, моли Слова Христа Бога спастися душам нашим.
Кондак, глас 1-й
Возвеселися таинственно честная Церковь возвращением честных твоих мощей и, сия сокрывши, яко злато многоценное, поющим тя неоскудно подавает молитвами твоими исцелений благодать, Иоанне Златоусте.
30 января/12 февраля
Трех святителей: Василия Великого,
Григория Богослова и Иоанна Златоустого
Тропарь, глас 4-й
Яко апостолов единонравнии и вселенныя учителие, Владыку всех молите, мир вселенней даровати и душам нашим велию милость.
Кондак, глас 2-й
Священныя и боговещанныя проповедники, верх учителей, Господи, приял еси в наслаждение благих Твоих и упокоение; труды бо онех и смерть приял еси паче всякаго всеплодия, Едине прославляяй святыя Твоя.
Величание
Величаем вас, святителие Василие, Григорие и Иоанне, и чтим святую память вашу: вы бо молите за нас Христа Бога нашего.
2/15 февраля
Сретение Господа нашего Иисуса Христа
Тропарь, глас 1-й
Радуйся, Благодатная Богородице Дево, из Тебе бо возсия Солнце правды, Христос Бог наш, просвещаяй сущия во тьме. Веселися и ты, старче праведный, приемый во объятия Свободителя душ наших, дарующаго нам воскресение.
Кондак, глас 1-й
Утробу Девичу освятивый рождеством Твоим, и руце Симеоне благословивый, якоже подобаше, предварив, и ныне спасл еси нас, Христе Боже, но умири во бранех жительство и укрепи люди, ихже возлюбил еси, Едине Человеколюбче.
Величание
Величаем Тя, Живодавче Христе, и чтим Пречистую Матерь Твою, Еюже по закону ныне принеслся еси в храм Господень.
Задостойник, глас 3-й
Богородице Дево, упование христианом, покрый, соблюди и спаси на Тя уповающих.
В законе сени и писаний образ видим вернии, всяк мужеский пол, ложесна разверзая, свят Богу. Тем перворожденное Слово Отца Безначальна, Сына первородящася Материю неискусомужно, величаем.
12/25 февраля, также 20 мая / 2 июня
Святителя Алексия, митрополита Московского
Тропарь, глас 8-й
Яко апостолом сопрестольна, и врача предобра, и служителя благоприятна, к раце твоей честней притекающе, святителю Алексие, богомудре чудотворче, сошедшеся любовию в память твою, светло празднуем, в песнех и пениих радующеся и Христа славяще, таковую благодать тебе даровавшаго исцелений и граду твоему великое утверждение.
Кондак, глас 8-й
Божественнаго и пречестнаго святителя Христова, новаго чудотворца Алексия, верно вси поюще людие, любовию да ублажим, яко пастыря великаго, служителя же и учителя премудра земли Российстей. Днесь в память его притекше, радостно возопием песнь богоносному: яко имея дерзновение к Богу, многообразных нас избави обстояний, да зовем ти: радуйся, утверждение граду нашему.
Величание
Величаем тя, святителю отче Алексие, и чтим святую память твою, ты бо молиши за нас Христа Бога нашего.
25 марта/7 апреля
Благовещение Пресвятой Богородицы
Тропарь, глас 4-й
Днесь спасения нашего главизна, и еже от века таинства явление: Сын Божий, Сын Девы бывает, и Гавриил благодать благовествует. Темже и мы с ним Богородице возопиим: радуйся, Благодатная, Господь с Тобою.
Кондак, глас 8-й
Взбранной Воеводе победительная, яко избавльшеся от злых, благодарственная восписуем Ти раби Твои, Богородице; но яко имущая державу непобедимую, от всяких нас бед свободи, да зовем Ти: радуйся, Невесто Неневестная.
Величание
Архангельский глас вопием Ти, Чистая: радуйся, Благодатная, Господь с Тобою.
Задостойник, глас 4-й
Благовествуй, земле, радость велию, хвалите, небеса, Божию славу.
Яко одушевленному Божию Кивоту, да никакоже коснется рука скверных. Устне же верных Богородице немолчно, глас Ангела воспевающе, с радостию да вопиют: радуйся, Благодатная, Господь с Тобою.
Задостойник, глас 8-й
Чужде матерем девство и странно девам деторождение: на Тебе, Богородице, обоя устроишася. Тем Тя вся племена земная непрестанно величаем.
23 апреля/6 мая
Святого великомученика
и Победоносца Георгия
Тропарь, глас 4-й
Яко пленных свободитель и нищих защититель, немощствующих врач, Победоносче великомучениче Георгие, моли Христа Бога, спастися душам нашим.
Кондак, глас 4-й
Возделан от Бога показался еси благочестия делатель честнейший, добродетелей рукояти собрав себе, сеяв бо в слезах, веселием жнеши, страдальчествовав же кровию, Христа приял еси, и молитвами, святе, твоими всем подаеши прегрешений прощение.
Величание
Величаем тя, страстотерпче святый Георгие, и чтим честная страдания твоя, яже за Христа претерпел еси.
25 апреля/8 мая
Святого апостола и евангелиста Марка
Тропарь, глас 3-й
У верховнаго Петра научився, апостол Христов был еси, и яко солнце странам возсиял еси, Александриом удобрение быв, блаженне. Тобою Египет от прелести свободися, евангельским твоим учением просвещ вся, яко свет, столп церковный. Сего ради твою память чтуще, светло празднуем, Марко богогласе: моли тобою благовестимаго Бога, да согрешений оставление подаст душам нашим.
Кондак, глас 2-й
С высоты приим благодать Духа, риторская плетения разрушил еси, апостоле, и языки вся уловив, Марко всеславне, твоему Владыце привел еси, Божественное проповедав Евангелие.
Величание
Величаем тя, апостоле Христов и евангелисте Марко, и чтим болезни и труды твоя, имиже трудился еси во благовестии Христове.
9/22 мая
Перенесение мощей святителя
и чудотворца Николая
Тропарь, глас 4-й
Приспе день светлаго торжества, град Барский радуется, и с ним вселенная вся ликовствует песньми и пеньми духовными: днесь бо священное торжество, в пренесение честных и многоцелебных мощей святителя и чудотворца Николая, якоже солнце незаходимое возсия, светозарными лучами, разгоняя тьму искушений же и бед от вопиющих верно: спасай нас яко предстатель наш, великий Николае.
Кондак, глас 3-й
Взыде, яко звезда, от востока до запада, твоя мощи, святителю Николае, море же освятися шествием твоим, и град Барский приемля тобою благодать: нас бо деля явился еси, чудотворец изящный, предивный и милостивый.
Величание
Величаем тя, святителю отче Николае, и чтим святую память твою, ты бо молиши за нас Христа Бога нашего.
11/24 мая
Святых равноапостольных
Мефодия и Кирилла, учителей Словенских
Тропарь, глас 4-й
Яко апостолом единонравнии и словенских стран учителие, Кирилле и Мефодие богомудрии, Владыку всех молите, вся языки словенския утвердити в Православии и единомыслии, умирити мир, и спасти души наша.
Кондак, глас 3-й
Священную двоицу просветителей наших почтим, Божественных писаний преложением источник богопознания нам источивших, из негоже даже до днесь неоскудно почерпающе, ублажаем вас, Кирилле и Мефодие, Престолу Вышняго предстоящих и тепле молящихся о душах наших.
Величание
Величаем вас, святии равноапостольнии Мефодие и Кирилле, вся Словенския страны ученьми своими просветившия и ко Христу приведшия.
21 мая/3 июня
Святых равноапостольных
Константина и Елены
Тропарь, глас 8-й
Креста Твоего образ на небеси видев, и якоже Павел звание не от человек прием, во царех апостол Твой, Господи, царствующий град в руце Твоей положи, егоже спасай всегда в мире молитвами Богородицы, Едине Человеколюбче.
Кондак, глас 3-й
Константин днесь с материю Еленою Крест являют, всечестное Древо, всех убо иудеов посрамление суще, оружие же на противныя верных: нас бо ради явися знамение велие и во бранех грозное.
Величание
Величаем вас, святии благовернии и равноапостольнии царие Константине и Елено, и чтим святую память вашу, вы бо святым Крестом всю вселенную просветили есте.
11/24 июня
Святых апостолов Варфоломея и Варнавы
Тропарь, глас 3-й
Апостоли святии, молите милостиваго Бога, да прегрешений оставление подаст душам нашим.
Кондак апостолу Варфоломею, глас 4-й
Явился еси великое солнце вселенней, учений сияньми и чудес страшных световодя почитающия тя, Варфоломее, Господень апостоле.
Кондак апостолу Варнаве, глас 3-й
Господень был еси всеистинный служитель, апостолов же явился еси седмидесятих первый, озарил еси и с Павлом проповедь твою, всем возвещаяй Христа Спаса: сего ради песнопении Божественную память твою, Варнаво, совершаем.
Величание
Величаем вас, апостоли святии Варфоломее и Варнаво, и чтим болезни и труды ваша, имиже трудилися есте во благовестии Христове.
15/28 июня
Святителя Ионы, митрополита Московского
и всея Руси, чудотворца
Тропарь, глас 4-й
От юности твоея весь сам себе Господеви возложив, в молитвах и трудех, и в постех образ быв добродетели, отонудуже видев Бог твое благое произволение, архиерея тя и пастыря Церкве Своей устрояет. Темже и по преставлении честное тело твое цело и нетленно соблюдеся, Ионо святителю: моли Христа Бога, да спасет души наша.
Кондак, глас 8-й
Яко от младенства Господеви поработив себе, мудре, постом и бдением тело твое удручая, тем же сосуд чист и дом Духу Пресвятому явился еси: сего ради и Церкви Своей тебе архиерея и пастыря устрояет, юже добре упас, ко Господу отходиши, Егоже возлюбил еси. Тем молим тя: поминай нас, верою чтущих святую память твою, да вси зовем ти: радуйся, отче Ионо, святителю всечестный.
Величание
Величаем тя, святителю отче Ионо, и чтим святую память твою, ты бо молиши за нас Христа Бога нашего.
24 июня/7 июля
Рождество святого Пророка, Предтечи
и Крестителя Господня Иоанна
Тропарь, глас 4-й
Пророче и Предтече пришествия Христова, достойно восхвалити тя недоумеем мы, любовию чтущии тя: неплодство бо рождшия и отчее безгласие разрешися славным и честным твоим рождеством, и воплощение Сына Божия мирови проповедуется.
Кондак, глас 3-й
Прежде неплоды днесь Христова Предтечу раждает, и той есть исполнение всякаго пророчества: Егоже бо пророцы проповедаша, на Сего во Иордане руку положив, явися Божия Слова пророк, проповедник, вкупе и Предтеча.
Величание
Величаем тя, Предтече Спасов Иоанне, и чтим еже от неплодове преславное рождество твое.
29 июня/12 июля
Святых первоверховных апостолов
Петра и Павла
Тропарь, глас 4-й
Апостолов первопрестольницы, и вселенныя учителие, Владыку всех молите, мир вселенней даровати, и душам нашим велию милость.
Кондак, глас 2-й
Твердыя и боговещанныя проповедатели, верх апостолов Твоих, Господи, приял еси в наслаждение благих Твоих и покой: болезни бо онех и смерть приял еси, паче всякаго всеплодия, Едине сведый сердечная.
Величание
Величаем вас, апостоли Христовы Петре и Павле, весь мир ученьми своими просветившия, и вся концы ко Христу приведшия.
11/24 июля
Святой равноапостольной княгини
Российской Ольги
Тропарь, глас 1-й
Крилами богоразумия вперивши твой ум, возлетела еси превыше видимыя твари; взыскавши Бога и Творца всяческих, и Того обретши, пакирождение крещением прияла еси; древа животнаго наслаждающися, нетленна во веки пребываеши, Ольго приснославная.
Кондак, глас 4-й
Воспоем днесь Благодетеля всех Бога, прославльшаго в России Ольгу богомудрую, да молитвами ея подаст душам нашим грехов оставление.
Величание
Величаем тя, святая равноапостольная княгине Ольго, яко зарю утреннюю в земли нашей возсиявшую и свет веры Православныя народу своему предвозвестившую.
15/28 июля
Святого равноапостольного князя Владимира
Тропарь, глас 4-й
Уподобился еси купцу, ищущему добраго бисера, славнодержавный Владимире, на высоте стола седя матери градов богоспасаемаго Киева; испытуя же и посылая к Царскому граду уведети Православную веру, обрел еси безценный бисер, Христа, избравшаго тя яко втораго Павла, и оттрясшаго слепоту во святей купели душевную, вкупе и телесную. Темже празднуем твое успение, людие твои суще. Моли спастися державы твоея Российския начальником и множеству владомых.
Кондак, глас 8-й
Подобствовав великому апостолу Павлу, в сединах, всеславне Владимире, вся, яко младенческая мудрования, яже о идолех тщания оставль, яко муж совершенный, украсился еси Божественнаго Крещения багряницею; и ныне Спасу Христу в веселии предстоя, моли спастися державы Российския начальником и множеству владомых.
Величание
Величаем тя, святый равноапостольный княже Владимире, и чтим святую память твою, идолы поправшаго и всю Российскую землю святым Крещением просветившаго.
20 июля/2 августа
Святого славного пророка Илии
Тропарь, глас 4-й
Во плоти ангел, пророков основание, вторый предтеча пришествия Христова, Илия славный, свыше пославый Елисееви благодать, недуги отгоняти, и прокаженныя очищати. Темже и почитающим его точит исцеления.
Кондак, глас 2-й
Пророче и провидче великих дел Бога нашего, Илие великоимените, вещанием твоим уставивый водоточныя облаки, моли о нас Единаго Человеколюбца.
Величание
Величаем тя, святый славный пророче Божий Илие, и чтим, еже на Небеса на колеснице огненней преславное восхождение твое.
24 июля/6 августа
Святых мучеников благоверных князей Бориса
и Глеба, во святом крещении Романа и Давида
Тропарь, глас 2-й
Правдивая страстотерпца и истинная Евангелия Христова послушателя, целомудренный Романе с незлобивым Давидом, не сопротив стаста врагу сущу брату, убивающему телеса ваша, душам же коснутися не могущу. Да плачется убо злый властолюбец, вы же, радующеся с лики Ангельскими, предстояще Святей Троице, молитеся о державе сродников ваших, богоугодней быти, и сыновом Российским спастися.
Кондак, глас 3-й
Возсия днесь преславная память ваша, благороднии страстотерпцы Христовы Романе и Давиде, созывающи нас к похвалению Христа Бога нашего. Тем, притекающе к раце мощей ваших, исцеления дар приемлем молитвами вашими, святии: вы бо Божественнии врачеве есте.
1/14 августа
Происхождение древ Честного
и Животворящего Креста. Всемилостивого Спаса
Тропарь и кондак Кресту см. 14/27 сентября
Тропарь Всемилостивому Спасу, глас 8-й
С вышних призирая, убогия приемля, посети нас озлобленныя грехи, Владыко Всемилостиве, молитвами Богородицы, даруй душам нашим велию милость.
Кондак, глас 4-й
Всякия скверны, Всемилостивый Спасе, аз бых делатель, и во отчаяния ров впадся, но стеню от сердца и вопию к Тебе, Слове: ускори, Щедрый, и потщися на помощь нашу, яко Милостив.
6/19 августа
Преображение Господа нашего Иисуса Христа
Тропарь, глас 1-й
Преобразился еси на горе, Христе Боже, показавый учеником Твоим славу Твою, якоже можаху, да возсияет и нам грешным свет Твой присносущный, молитвами Богородицы, Светодавче, слава Тебе.
Кондак, глас 1-й
На горе преобразился еси, и якоже вмещаху ученицы Твои, славу Твою, Христе Боже, видеша: да егда Тя узрят распинаема, страдание убо уразумеют вольное, мирови же проповедят, яко Ты еси воистинну Отчее сияние.
Величание
Величаем Тя, Живодавче Христе, и почитаем Пречистыя Плоти Твоея преславное преображение.
Задостойник, глас 4-й
Величай, душе моя, на Фаворе преобразившагося Господа.
Рождество Твое нетленно явися, Бог из боку Твоею пройде, яко Плотоносец явийся на земли, и с человеки поживе. Тя, Богородице, тем вси величаем.
15/28 августа
Успение Пресвятой Богородицы
Тропарь, глас 1-й
В рождестве девство сохранила еси, во успении мира не оставила еси, Богородице, преставилася еси к животу, Мати сущи Живота, и молитвами Твоими избавляеши от смерти души наша.
Кондак, глас 2-й
В молитвах неусыпающую Богородицу и в предстательствах непреложное упование, гроб и умерщвление не удержаста: якоже бо Живота Матерь, к животу престави во утробу Вселивыйся приснодевственную.
Величание
Величаем Тя, Пренепорочная Мати Христа Бога нашего, и всеславное славим Успение Твое.
Задостойник, глас 1-й
Ангели Успение Пречистыя видевше, удивишася, како Дева восходит от земли на небо.
Побеждаются естества уставы в Тебе, Дево чистая, девствует бо рождество, и Живот предобручает смерть; по рождестве Дева, и по смерти жива, и спасаеши присно, Богородице, наследие Твое.
16/29 августа
Нерукотворенного образа Господа
нашего Иисуса Христа
Тропарь, глас 2-й
Пречистому Твоему образу покланяемся, Благий, просяще прощения прегрешений наших, Христе Боже: волею бо благоволил еси плотию взыти на Крест, да избавиши яже создал еси от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
Кондак, глас 2-й
Неизреченнаго и Божественнаго Твоего к человеком смотрения, неописанное Слово Отчее, и образ неписанный и богописанный победителен ведуще неложнаго Твоего воплощения, почитаем того лобызающе.
Величание
Величаем Тя, Живодавче Христе, и почитаем вси Пречистаго Лика Твоего преславное изображение.
29 августа/11 сентября
Усекновение главы Предтечи
и Крестителя Иоанна
Тропарь, глас 2-й
Память праведнаго с похвалами, тебе же довлеет свидетельство Господне, Предтече: показал бо ся еси воистинну и пророков честнейший, яко и в струях крестити сподобился еси Проповеданнаго. Темже за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость.
Кондак, глас 5-й
Предтечево славное усекновение, смотрение бысть некое Божественное: да и сущим во аде Спасово проповесть пришествие. Да рыдает убо Иродия, беззаконное убийство испросивши: не закон бо Божий, ни живый век возлюби, но притворный, привременный.
Величание
Величаем тя, Крестителю Спасов Иоанне, и почитаем вси честныя твоея главы усекновение.
30 августа/12 сентября
Обретение мощей святого благоверного
князя Даниила Московского
Тропарь, глас 3-й
Явился еси в стране нашей, яко звезда пресветлая, благоверный княже Данииле, лучами света твоего озаряя град твой и обитель твою, людем православным поборник еси, пленным свободитель и нищим защититель, моли Христа Бога державе Российстей даровати мир и спасти души наша.
Кондак, глас 6-й
Еже по образу соблюд непреложно и яже в мире тленная оставив, со Ангельскими лики предстоиши Христу, преподобне княже Данииле, никакоже забывая чад твоих, но милостивно посещая и глаголя им: аз есмь с вами, и никтоже на вы.
Величание
Ублажаем тя, благоверный княже Данииле, и чтим святую память твою, ты бо молиши за нас Христа Бога нашего.
© Онлайн библиотека сайта Православие и мир, 2011–2024
