Молитва святого Ефрема Сирина
(Читается на службе в среду и пятницу Сырной седмицы, во все дни Великого поста до Великой Среды, кроме субботних и воскресных дней. В эти дни молитву святого Ефрема Сирина читают также в конце утренних и вечерних молитв.)
Господи и Владыко живота моего, дух праздности, уныния, любоначалия и празднословия не даждь ми. (Земной поклон.)
Дух же целомудрия, смиренномудрия, терпения и любве даруй ми, рабу Твоему. (Земной поклон.)
Ей Господи, Царю, даруй ми зрети моя прегрешения и не осуждати брата моего; яко благословен еси во веки веков. Аминь. (Земной поклон.)
12 поясных поклонов с молитвой:
Боже, очисти мя грешнаго и помилуй мя.
И повторяется вся молитва полностью:
Господи и Владыко... Дух же целомудрия... Ей Господи, Царю... (И поклон один земной.)
На всенощном бдении
Покаянная песнь, глас 8-й
(Эти покаянные песни Церковь поет от Недели мытаря и фарисея до 5-й Недели Великого поста)
Слава: Покаяния отверзи ми двери, Жизнодавче, утренюет бо дух мой ко храму святому Твоему, храм носяй телесный весь осквернен: но яко Щедр, очисти благоутробною Твоею милостию.
И ныне, Богородичен: На спасения стези настави мя, Богородице, студными бо окалях душу грехми, и в лености все житие мое иждих: но Твоими молитвами избави мя от всякия нечистоты.
Глас 6-й: Помилуй мя, Боже по велицей милости Твоей и по множеству щедрот Твоих, очисти беззаконие мое.
Множества содеянных мною лютых, помышляя окаянный, трепещу страшнаго дне суднаго: но надеяся на милость благоутробия Твоего, яко Давид вопию Ти: помилуй мя, Боже, по велицей Твоей милости.
Псалом 136
(В Недели о блудном сыне, мясопустную и сыропустную.)
1На реках Вавилонских, тамо седохом и плакахом, внегда помянути нам Сиона; 2на вербиих посреде его обесихом органы наша. 3Яко тамо вопросиша ны пленшии нас о словесех песней и ведшии нас о пении: воспойте нам от песней Сионских. 4Како воспоем песнь Господню на земли чуждей. 5Аще забуду тебе, Иерусалиме, забвена буди десница моя. 6Прильпни язык мой гортани моему, аще не помяну тебе, аще не предложу Иерусалима, яко в начале веселия моего. 7Помяни, Господи, сыны Едомския, в день Иерусалимль глаголющия: истощайте, истощайте до оснований его. 8Дщи Вавилоня окаянная, блажен, иже воздаст тебе воздаяние твое, еже воздала еси нам. 9Блажен, иже имет и разбиет младенцы твоя о камень.
На Великопостной вечерни
Прокимны великие, глас 8-й
(Великие прокимны поются попеременно через воскресенье, начиная с Недели мясопустной до 5-й Недели Великого поста.)
Не отврати лица Твоего от отрока Твоего, яко скорблю, скоро услыши мя. Вонми души моей, и избави ю.
Дал еси достояние боящимся Тебе, Господи.
Тропари, глас 4-й
Богородице Дево, радуйся, Благодатная Марие, Господь с Тобою: благословена Ты в женах, и благословен Плод чрева Твоего, яко Спаса родила еси душ наших. (Земной поклон.)
Слава: Крестителю Христов, всех нас помяни, да избавимся от беззаконий наших: тебе бо дадеся благодать молитися за ны. (Земной поклон.)
И ныне: Молите за ны святии апостоли, святии вси, да избавимся от бед и скорбей: вас бо теплыя предстатели ко Спасу стяжахом. (Земной поклон.)
Под Твое благоутробие прибегаем, Богородице, моления наша не презри во обстоянии: но от бед избави ны, Едина Чистая, Едина Благословенная. (Без поклона.)
На Великопостной утрени
Песни Троичны 8-ми гласов
Глас 1-й
Плотскими образовании Безплотных сил к мысленному и невещественному возводими уму и Трисвятою песнию Триипостаснаго Божества приемлюще сияние, херувимски возопиим Единому Богу: Свят, Свят, Свят еси, Боже наш: Предстательствы Безплотных Твоих помилуй нас.
[Это окончание молитвы читаем только в понедельник. Во вторник: «Молитвами Предтечи Твоего помилуй нас». В среду и пятницу: «Силою Креста Твоего сохрани нас, Господи». В четверг: «Молитвами святых апостол Твоих и святителя Николая помилуй нас». Тропари на «Слава» и «И ныне» читаются без изменения.]
Слава: Со всеми Небесными силами херувимски Сущему в Вышних возопиим, Трисвятую возсылающе хвалу: Свят, Свят, Свят еси, Боже наш, молитвами всех святых Твоих помилуй нас.
И ныне: Воставше от сна, припадаем Ти, Блаже, и Ангельскую песнь вопием Ти, Сильне: Свят, Свят, Свят еси, Боже, Богородицею помилуй нас.
Глас 2-й
Вышния силы подражающе на земли, победную песнь приносим Ти, Блаже: Свят, Свят, Свят еси, Боже наш:
Слава: Несозданное Естество, всех Зиждителю, устне наша отверзи, яко да возвестим хвалу Твою, вопиюще: Свят, Свят, Свят еси, Боже наш, молитвами всех святых Твоих помилуй нас.
И ныне: От одра и сна воздвигл мя еси, Господи, ум мой просвети и сердце и устне мои отверзи, во еже пети Тя, Святая Троице: Свят, Свят, Свят еси, Боже, Богородицею помилуй нас.
Глас 3-й
Троице Единосущная и Нераздельная, Единице Триипостасная и Соприсносущная, Тебе, яко Богу, ангельскую песнь вопием: Свят, Свят, Свят еси, Боже наш:
Слава: Отца Безначальна, Сына Собезначальна, Духа Соприсносущна — Божество Едино херувимски славословити дерзающе, глаголем: Свят, Свят, Свят еси, Боже наш, молитвами всех святых Твоих помилуй нас.
И ныне: Внезапно Судия приидет, и коегождо деяния обнажатся, но страхом зовем в полунощи: Свят, Свят, Свят еси, Боже наш, Богородицею помилуй нас.
Глас 4-й
Умных Твоих слуг приносити смертнии песнь дерзающе, глаголем: Свят, Свят, Свят еси, Боже наш:
Слава: Яко чини ныне Ангельстии на небеси и стояния страхом человеческая на земли, победную песнь приносим Ти, Блаже: Свят, Свят, Свят еси, Боже наш, молитвами всех святых Твоих помилуй нас.
И ныне: Безначальнаго Твоего Отца и Тебе, Христе Боже, и Пресвятаго Твоего Духа херувимски славословити дерзающе, глаголем: Свят, Свят, Свят еси, Боже наш, Богородицею помилуй нас.
Глас 5-й
Пению время и молитве час, прилежно возопиим Единому Богу: Свят, Свят, Свят еси, Боже наш:
Слава: Образовати дерзающе умная Твоя воинства, Троице Безначальная, усты недостойными вопием: Свят, Свят, Свят еси, Боже наш, молитвами всех святых Твоих помилуй нас.
И ныне: Иже в ложесна Девическая вместивыйся и недр Отеческих не разлучивыйся, со Ангелы и нас, Христе Боже, приими, вопиющих Ти: Свят, Свят, Свят еси, Боже наш, Богородицею помилуй нас.
Глас 6-й
Предстояще со страхом Херувими, ужасающеся с трепетом Серафими, Трисвятую песнь приносят немолчным гласом. С нимиже и мы вопием, грешнии: Свят, Свят, Свят еси, Боже наш:
Слава: Безплотными усты, немолчными славословеньми шестокрильнии вопиют Ти Трисвятую песнь, Боже наш. И мы, иже на земли, недостойными усты хвалу Ти возсылаем: Свят, Свят, Свят еси, Боже наш, молитвами всех святых Твоих помилуй нас.
И ныне: Троичныя Единицы Божество неслиянным соединением славим и ангельскую песнь вопием: Свят, Свят, Свят еси, Боже наш, Богородицею помилуй нас.
Глас 7-й
Вышнею силою херувимски воспеваемый и Божественною славою ангельски покланяемый, приими и нас, сущих на земли, недостойными устнами хваление Тебе возсылающих: Свят, Свят, Свят еси, Боже наш:
Слава: Яко сон, леность отложивши, душе, исправление к хвалению покажи Судии, и со страхом возопий: Свят, Свят, Свят еси, Боже наш, молитвами всех святых Твоих помилуй нас.
И ныне: Неприступному Божеству во Единице Троице серафимскую Трисвятую возсылающе хвалу, со страхом возопиим: Свят, Свят, Свят еси, Боже наш, Богородицею помилуй нас.
Глас 8-й
На небо сердца имуще, Ангельский подражаим чин и со страхом Судии припадем, noбедную взывающе хвалу: Свят, Свят, Свят еси, Боже наш:
Слава: Зрети Тебе не смеюще Херувими, летяще, зовут со восклицанием Божественную песнь Трисвятаго гласа, с нимиже и мы вопием Ти: Свят, Свят, Свят еси, Боже наш, молитвами всех святых Твоих помилуй нас.
И ныне: Сляцаеми множеством прегрешений наших и не смеюще воззрети на высоту небесную, душу с телом преклоньше, со Ангелы песнь вопием Ти: Свят, Свят, Свят еси, Боже, Богородицею помилуй нас.
На Великопостных часах
Тропарь первого часа, глас 6-й
Заутра услыши глас мой, Царю мой и Боже мой. (Земной поклон.)
Стих 1: Глаголы моя внуши, Господи, разумей звание мое.
Заутра услыши глас мой, Царю мой и Боже мой. (Земной поклон.)
Стих 2: Яко к Тебе помолюся, Господи.
Заутра услыши глас мой, Царю мой и Боже мой. (Земной поклон.)
Тропарь третьего часа, глас 6-й
Господи, Иже Пресвятаго Твоего Духа в третий час апостолом Твоим низпославый, Того, Благий, не отыми от нас, но обнови нас, молящих Ти ся. (Земной поклон.)
Стих 1: Сердце чисто созижди во мне, Боже, и дух прав обнови во утробе моей.
Господи, Иже Пресвятаго Твоего Духа в третий час апостолом Твоим низпославый, Того, Благий, не отыми от нас, но обнови нас, молящих Ти ся. (Земной поклон.)
Стих 2: Не отвержи мене от лица Твоего и Духа Твоего Святаго не отыми от мене.
Господи, Иже Пресвятаго Твоего Духа в третий час апостолом Твоим низпославый, Того, Благий, не отыми от нас, но обнови нас, молящих Ти ся. (Земной поклон.)
Тропарь шестого часа, глас 2-й
Иже в шестый день же и час, на кресте пригвождей в раи дерзновенный Адамов грех, и согрешений наших рукописание раздери, Христе Боже, и спаси нас. (Земной поклон.)
Стих 1: Внуши, Боже, молитву мою, и не презри моления моего.
Иже в шестый день же и час, на кресте пригвождей в раи дерзновенный Адамов грех, и согрешений наших рукописание раздери, Христе Боже, и спаси нас. (Земной поклон.)
Стих 2: Аз к Богу воззвах, и Господь услыша мя.
Иже в шестый день же и час, на кресте пригвождей в раи дерзновенный Адамов грех, и согрешений наших рукописание раздери, Христе Боже, и спаси нас. (Земной поклон.)
Тропарь девятого часа, глас 8-й
Иже в девятый час нас ради плотию смерть вкусивый, умертви плоти нашея мудрование, Христе Боже, и спаси нас. (Земной поклон.)
Стих 1: Да приближится молитва моя пред Тя, Господи, по словеси Твоему вразуми мя.
Иже в девятый час нас ради плотию смерть вкусивый, умертви плоти нашея мудрование, Христе Боже, и спаси нас. (Земной поклон.)
Стих 2: Да внидет прошение мое пред Тя, Господи, по словеси Твоему избави мя.
Иже в девятый час нас ради плотию смерть вкусивый, умертви плоти нашея мудрование, Христе Боже, и спаси нас. (Земной поклон.)
На Великом повечерии
День прешед, благодарю Тя, Господи, вечер прошу с нощию без греха подаждь ми, Спасе, и спаси мя.
Слава: День прешед, славословлю Тя, Владыко, вечер прошу с нощию безсоблазнство подаждь ми, Спасе, и спаси мя.
И ныне: День прешед, песнословлю Тя, Святый, вечер прошу с нощию ненаветен подаждь ми, Спасе, и спаси мя.
Глас 6-й
Господи сил, с нами буди, иного бо разве Тебе помощника в скорбех не имамы; Господи сил, помилуй нас.
Стих 1: Хвалите Бога во святых Его, хвалите Его во утвержении силы Его.
Господи сил, с нами буди, иного бо разве Тебе помощника в скорбех не имамы; Господи сил, помилуй нас.
Стих 2: Хвалите Его на силах Его, хвалите Его по множеству величествия Его.
Господи сил, с нами буди, иного бо разве Тебе помощника в скорбех не имамы; Господи сил, помилуй нас.
Стих 3: Хвалите Его во гласе трубнем, хвалите Его во псалтири и гуслех.
Господи сил, с нами буди, иного бо разве Тебе помощника в скорбех не имамы; Господи сил, помилуй нас.
Стих 4: Хвалите Его в тимпане и лице, хвалите Его во струнах и органе.
Господи сил, с нами буди, иного бо разве Тебе помощника в скорбех не имамы; Господи сил, помилуй нас.
Стих 5: Хвалите Его в кимвалех доброгласных, хвалите Его в кимвалех восклицания; всякое дыхание да хвалит Господа.
Слава: Господи, аще не быхом святыя Твоя имели молитвенники и благостыню Твою, милующую нас: како смели быхом, Спасе, пети Тя, Егоже славословят непрестанно Ангели? Сердцеведче, пощади души наша.
И ныне: Многая множества моих, Богородице, прегрешений, к Тебе прибегох, Чистая, спасения требуя, посети немощствующую мою душу, и моли Сына Твоего и Бога нашего, дати ми оставление, яже содеях лютых, Едина Благословенная.
Всесвятая Богородице, во время живота моего не остави мене, человеческому предстательству не ввери мя, но Сама заступи и помилуй мя.
Все упование мое на Тя возлагаю, Мати Божия: сохрани мя под кровом Твоим.
На литургии Преждеосвященных Даров
Прокимен великий
Да исправится молитва моя, яко кадило пред Тобою: воздеяние руку моею, жертва вечерняя.
Стих 1: Господи, воззвах к Тебе, услыши мя: вонми гласу моления моего внегда воззвати ми к Тебе.
Да исправится молитва моя, яко кадило пред Тобою: воздеяние руку моею, жертва вечерняя.
Стих 2: Положи, Господи, хранение устом моим и дверь ограждения о устнах моих.
Да исправится молитва моя, яко кадило пред Тобою: воздеяние руку моею, жертва вечерняя.
Стих 3: Не уклони сердце мое в словеса лукавствия, непщевати вины о гресех.
Да исправится молитва моя, яко кадило пред Тобою: воздеяние руку моею, жертва вечерняя.
Вместо Херувимской песни
Ныне силы Небесныя с нами невидимо служат: се бо входит Царь Славы, се Жертва тайная совершенна дориносится.
Верою и любовию приступим, да причастницы жизни вечныя будем. Аллилуия, аллилуия, аллилуия.
Во время этого песнопения совершается перенесение освященных Святых Даров, и все молящиеся должны преклониться ниц до земли.
ПОДГОТОВИТЕЛЬНЫЕ НЕДЕЛИ ПЕРЕД ВЕЛИКИМ ПОСТОМ
Неделя о мытаре и фарисее
(Сплошная седмица, в среду и пятницу поста нет.)
На литургии читается Евангелие от Луки, гл. 18, ст. 10–14: притча о мытаре и фарисее.
Тропарь воскресный гласа
Кондак, глас 4-й
Фарисеева убежим высокоглаголания, и мытареве научимся высоте глагол смиренных, покаянием взывающе: Спасе мира, очисти рабы Твоя.
Другой кондак, глас 3-й
Воздыхания принесем мытарская Господеви, и к Нему приступим грешнии яко Владыце: хощет бо спасения всех человеков, оставление подает всем кающимся. Нас бо ради воплотися, Бог сый, Отцу Собезначальный.
Неделя о блудном сыне
Евангелие от Луки, гл. 15, ст. 11—32: притча о блудном сыне.
Тропарь воскресный гласа
Кондак, глас 3-й
Отеческия славы Твоея удалихся безумно, в злых расточив еже ми предал еси богатство. Темже Ти блуднаго глас приношу: согреших пред Тобою, Отче Щедрый, приими мя кающася, и сотвори мя яко единаго от наемник Твоих.
Неделя о Страшном Суде, мясопустная
(Заговенье на мясную пищу.)
Евангелие от Матфея, гл. 25, ст. 31–46.
Тропарь воскресный гласа
Кондак, глас 1-й
Егда приидеши, Боже, на землю со славою, и трепещут всяческая: река же огненная пред судищем влечет, книги разгибаются, и тайная являются: тогда избави мя от огня неугасимаго, и сподоби мя одесную Тебе стати, Судие Праведнейший.
Неделя сыропустная.
Воспоминание Адамова изгнания.
Прощеное воскресенье
(Заговенье на скоромную пищу.)
Евангелие от Матфея, гл. 6, ст. 14–21.
Тропарь воскресный гласа
Кондак, глас 6-й
Премудрости наставниче, смысла подателю, немудрых наказателю, и нищих защитителю, утверди, вразуми сердце мое, Владыко! Ты даждь ми слово, Отчее Слово, се бо устне мои не возбраню, во еже звати Тебе: Милостиве, помилуй мя падшаго.
ВЕЛИКИЙ ПОСТ
Великим постом в среду и пятницу совершается литургия Преждеосвященных Даров. Полная литургия совершается в субботу и воскресенье.
Неделя 1-я Великого поста.
Торжество Православия
Тропарь воскресный гласа
Тропарь, глас 2-й
Пречистому образу Твоему покланяемся, Благий, просяще прощения прегрешений наших, Христе Боже: волею бо благоволил еси плотию взыти на крест, да избавиши, яже создал еси от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.
Кондак, глас 2-й
Неописанное Слово Отчее, из Тебе, Богородице, описася воплощаемь: и оскверншийся образ в древнее вообразив, Божественною добротою смеси. Но исповедающе спасение, делом и словом, сие воображаем.
Неделя 2я Великого поста.
Святителя Григория Паламы
Тропарь воскресный гласа
Кондак, глас 4-й
Ныне время делательное явися, при дверех суд, востанем убо постящеся, принесем слезы умиления, милостынями, зовуще: согрешихом паче песка морскаго. Но ослаби, Содетелю всех, яко да приимем нетленныя венцы.
Святителю Григорию,
тропарь, глас 8-й
Православия светильниче, Церкве утверждение и учителю, монахов доброто, богословов поборниче непреоборимый, Григорие чудотворче, Фессалонитская похвало, проповедниче благодати, молися выну спастися душам нашим.
Кондак, глас 8-й
Премудрости священный и Божественный орган, богословия светлую согласно трубу, воспеваем тя, Григорие богоглагольниче: но яко ум, Уму первому предстояй, к Нему ум наш, отче, настави, да зовем: радуйся, проповедниче благодати.
Неделя 3-я Великого поста.
Крестопоклонная
Тропарь воскресный гласа
Тропарь, глас 1-й
Спаси, Господи, люди Твоя и благослови достояние Твое, победы на сопротивныя даруя, и Твое сохраняя Крестом Твоим жительство.
Кондак, глас 1-й
Не ктому пламенное оружие хранит врат Едемских: на тыя бо найде преславный соуз древо крестное, смертное жало, и адова победа прогнася. Предстал бо еси, Спасе мой, вопия сущим во аде: внидите паки в рай.
Тропарь на поклонение Кресту, глас 6-й
Кресту Твоему покланяемся, Владыко, и святое воскресение Твое славим.
Стихира на целование Креста, глас 2-й
Приидите вернии, животворящему Древу поклонимся, на немже Христос Царь Славы волею руце распростер, вознесе нас на первое блаженство, ихже прежде сластию украд враг, изгнаны от Бога сотвори. Приидите вернии, Древу поклонимся, имже сподобихомся невидимых враг сокрушити главы. Приидите вся отечествия язык, Крест Господень песньми почтим: радуйся Кресте, падшаго Адама совершенное избавление! О тебе вернии хвалятся, яко твоею силою исмаильтеския люди державно покаряющии. Тебе ныне со страхом христиане целуем: на тебе пригвоздившагося Бога славим, глаголюще: Господи на том пригвоздивыйся помилуй нас, яко Благ и Человеколюбец.
На воскресном всенощном бдении после Великого славословия выносится на поклонение Крест.
В понедельник и среду на 1-м часе также совершается поклонение Кресту.
В пятницу перед литургией Преждеосвященных Даров, после поклонения, Крест уносится в алтарь.
Неделя 4-я Великого поста.
Преподобного Иоанна Лествичника
Тропарь воскресный гласа
Тропарь, глас 1-й
Пустынный житель и в телеси ангел, и чудотворец явился еси, богоносе отче наш Иоанне; постом, бдением, молитвою небесная дарования приим, исцеляеши недужныя, и души верою притекающих ти. Слава Давшему ти крепость, слава Венчавшему тя, слава Действующему тобою всем исцеления.
Кондак, глас 4-й
На высоте Господь воздержания истинна тя положи, якоже звезду нелестную, световодящую концы, наставниче Иоанне отче наш.
Суббота Акафиста
(На утрени торжественно поется акафист
Пресвятой Богородице.)
Тропарь, глас 8-й
Повеленное тайно прием в разуме, в крове Иосифове тщанием предста безплотный, глаголя Неискусобрачней: приклонивый схождением небеса, вмещается неизменно весь в Тя. Егоже и видя в ложеснах Твоих приемша рабий зрак, ужасаюся звати Тебе: радуйся, Невесто Неневестная.
Стихира, глас 6-й
Совет превечный открывая Тебе, Отроковице, Гавриил предста, Тебе лобзая и вещая: радуйся, земле ненасеянная. Радуйся, купино неопалимая. Радуйся, глубино неудобозримая. Радуйся, мосте к небесем преводяй, и лествице высокая, юже Иаков виде. Радуйся, Божественная стамно манны. Радуйся, разрешение клятвы. Радуйся, Адамово воззвание, с Тобою Господь.
Неделя 5-я Великого поста.
Преподобной Марии Египетской
Тропарь воскресный гласа
Тропарь, глас 8-й
В тебе, мати, известно спасеся еже по образу; приимши бо крест, последовала еси Христу, и деющи учила еси презирати убо плоть, преходит бо, прилежати же о души вещи безсмертней. Темже и со Ангелы срадуется, преподобная Марие, дух твой.
Кондак, глас 3-й
Блудами первее преисполнена всяческими, Христова невеста днесь покаянием явися, ангельское жительство подражающи, демоны Креста оружием погубляет. Сего ради Царствия невеста явилася еси, Марие преславная.
Лазарева суббота
(На трапезе разрешается рыбная икра.)
Тропарь, глас 1-й
Общее воскресение прежде Твоея страсти уверяя, из мертвых воздвигл еси Лазаря, Христе Боже, темже и мы яко отроцы победы знамения носяще, Тебе победителю смерти, вопием: осанна в вышних, благословен Грядый во имя Господне.
Кондак, глас 2-й
Всех радость Христос, Истина, Свет, Живот, и мира Воскресение, сущим на земли явися Своею благостию, и бысть образ воскресения, всем подая Божественное оставление.
Задостойник, глас 8-й
Чистую славно почтим, людие, Богородицу, огнь Божества приимшую во чреве неопально, песньми величаем.
Неделя Ваий. Вход Господень
в Иерусалим. Вербное воскресенье
(На всенощном бдении после чтения Евангелия совершается освящение вербы.
На трапезе разрешается рыба.)
Тропарь, глас 1-й
Общее воскресение прежде Твоея страсти уверяя, из мертвых воздвигл еси Лазаря, Христе Боже, темже и мы яко отроцы победы знамения носяще, Тебе победителю смерти вопием: осанна в вышних, благословен Грядый во имя Господне.
Другой тропарь, глас 4-й
Спогребшеся Тебе крещением, Христе Боже наш, безсмертныя жизни сподобихомся воскресением Твоим, и воспевающе зовем: осанна в вышних, благословен Грядый во имя Господне.
Кондак, глас 6-й
На престоле на небеси, на жребяти на земли носимый, Христе Боже, Ангелов хваление, и детей воспевание приял еси зовущих Ти: благословен еси, грядый Адама воззвати.
Задостойник, глас 4-й
Бог Господь, и явися нам, составите праздник, и веселящеся приидите, возвеличим Христа, с ваиями и ветвьми, песньми зовуще: благословен Грядый во имя Господа Спаса нашего.
СТРАСТНАЯ СЕДМИЦА
В Великий Понедельник, Вторник и Среду на утрени
Тропарь, глас 3-й
Се Жених грядет в полунощи, и блажен раб, егоже обрящет бдяща, недостоин же паки, егоже обрящет унывающа. Блюди убо, душе моя, не сном отяготися, да не смерти предана будеши, и Царствия вне затворишися, но воспряни зовущи: Свят, Свят, Свят еси, Боже, Богородицею помилуй нас.
В Великий Понедельник, Вторник, Среду и Четверг на утрени
Ексапостиларий
Чертог Твой вижду, Спасе мой, украшенный, и одежды не имам, да вниду вонь: просвети одеяние души моея, Светодавче, и спаси мя.
Великий Понедельник
На утрени: Евангелие от Матфея, гл. 21, ст. 18–43.
На литургии: Евангелие от Матфея, гл. 24, ст. 3–35.
Кондак, глас 8-й
Иаков рыдаше Иосифова лишения, и доблий седяше на колеснице, яко царь почитаемь: египтяныни бо тогда сластем не поработав, воспрославляшеся от Ведущаго человеческая сердца, и посылающаго венец нетленный.
Великий Вторник
На утрени: Евангелие от Матфея, гл. 22, ст. 15–23, ст. 39. На литургии: Евангелие от Матфея, гл. 24, ст. 36 – гл. 26, ст. 2.
Кондак, глас 2-й
Час душе конца помысливши, и посечения смоковницы убоявшися, данный тебе талант трудолюбно делай, окаянная, бодрствующи и зовущи: да не пребудем вне чертога Христова.
Великая Среда
На утрени: Евангелие от Иоанна, гл. 12, ст. 17–50. На литургии: Евангелие от Матфея, гл. 26, ст. 6–16.
Кондак, глас 4-й
Паче блудницы, Блаже, беззаконновав, слез тучи никакоже Тебе принесох: но молчанием моляся припадаю Ти, любовию облобызая пречистеи Твои нозе, яко да оставление мне, яко Владыка подаси долгов, зовущу Ти, Спасе: от скверных дел моих избави мя.
Великий Четверг.
Воспоминание Тайной Вечери
На утрени: Евангелие от Луки, гл. 22, ст. 1–39. Литургия Василия Великого. Апостол: 1 Кор. 11, 23–32; Евангелие составное: Мф. 26, 1–20; Ин. 13, 3–17; Мф. 26, 21–39; Лк. 22, 43–45; Мф. 26, 40–27, 2.
Тропарь, глас 8-й
Егда славнии ученицы на умовении вечери просвещахуся, тогда Иуда злочестивый сребролюбием недуговав омрачашеся, и беззаконным судиям Тебе, праведнаго Судию, предает. Виждь имений рачителю, сих ради удавление употребивша. Бежи несытыя души, Учителю таковая дерзнувшия; Иже о всех Благий, Господи, слава Тебе.
Кондак, глас 2-й
Хлеб прием в руце предатель, сокровенно тыя простирает, и приемлет цену Создавшаго Своима рукама человека, и неисправлен пребысть Иуда раб и льстец.
Вместо Херувимской песни
Вечери Твоея тайныя днесь, Сыне Божий, причастника мя приими: не бо врагом Твоим тайну повем, ни лобзания Ти дам яко Иуда, но яко разбойник исповедаю Тя: помяни мя, Господи, во Царствии Твоем.
Задостойник, глас 6-й
Странствия Владычня, и безсмертныя трапезы на горнем месте, высокими умы, вернии, приидите насладимся, возшедша Слова, от Слова научившеся, Егоже величаем.
В Великий Четверг вечером совершается утреня с чтением 12 Евангелий последования Святых спасительных Страстей Господа нашего Иисуса Христа:
1) Ин. 13, 31–18, 1; 2) Ин. 28, 1–28; 3) Мф. 26, 5775; 4) Ин. 18, 28–19, 16; 5) Мф. 27, 3–32; 6) Мк. 15, 16–32; 7) Мф. 27, 33–54; 8) Лк. 23, 32–49; 9) Ин. 19, 25–37; 10) Мк. 15, 43–47; 11) Ин. 19, 38–42; 12) Мф. 27, 62–66.
Тропарь, глас 4-й
Искупил ны еси от клятвы законныя, честною Твоею кровию, на кресте пригвоздився, и копием прободся, безсмертие источил еси человеком, Спасе наш, слава Тебе.
Кондак, глас 8-й
Нас ради Распятаго, приидите вси воспоим, Того бо виде Мария на древе, и глаголаше: аще и распятие терпиши, Ты еси Сын и Бог Мой.
Ексапостиларий
Разбойника благоразумнаго, во едином часе раеви сподобил еси, Господи, и мене древом крестным просвети, и спаси мя.
Великая Пятница
(Литургия не совершается. День строгого поста.)
Царские часы
На 1-м часе тропарь, глас 1-й
Распеншуся Тебе, Христе, погибе мучительство, попрана бысть сила вражия: ниже бо Ангел, ниже человек, но Сам, Господи, спасл еси нас, слава Тебе.
На 3-м часе тропарь, глас 6-й
Господи, осудиша Тя иудее на смерть, Жизнь всех; иже Чермное море жезлом прошедший, на Кресте Тя пригвоздиша, и иже от камене мед ссавшии, желчь Тебе принесоша. Но волею претерпел еси, да нас свободиши от работы вражия, Христе Боже, слава Тебе.
На 6-м часе тропарь, глас 2-й
Спасение соделал еси посреде земли, Христе Боже; на Кресте пречистеи руце Твои простерл еси, собирая вся языки, зовущия: Господи, слава Тебе.
На 9-м часе тропарь, глас 8-й
Видя разбойник Начальника жизни на Кресте висяща, глаголаше: аще не бы Бог был воплощся Иже с нами Распныйся, не бы солнце лучи своя потаило, ниже бы земля, трепещущи, тряслася. Но вся Терпяй, помяни мя, Господи, во Царствии Твоем.
Великая Суббота
Утреня с Чином погребения Плащаницы
(Совершается в пятницу вечером или в ночь с пятницы на субботу.)
Тропари, глас 2-й
Благообразный Иосиф, с древа снем Пречистое Тело Твое, плащаницею чистою обвив, и вонями во гробе нове покрыв положи.
Слава: Егда снизшел еси к смерти, Животе безсмертный, тогда ад умертвил еси блистанием Божества. Егда же и умершия от преисподних воскресил еси, вся силы Небесныя взываху: Жизнодавче Христе Боже наш, слава Тебе.
И ныне: Мироносицам женам, при гробе представ, Ангел вопияше: мира мертвым суть прилична, Христос же нетления явися чуждь.
Кондак, глас 6-й
Бездну заключивый, мертв зрится, и смирною и плащаницею обвився, во гробе полагается яко смертный Безсмертный: жены же приидоша помазати Его миром, плачущия горько и вопиющия: сия суббота есть преблагословенная, в нейже Христос уснув, воскреснет тридневен.
Стихира на целование Плащаницы, глас 5-й
Приидите ублажим Иосифа приснопамятнаго, в нощи к Пилату пришедшаго, и Живота всех испросившаго: даждь ми Сего страннаго, Иже не имеет где главы подклонити; даждь ми Сего страннаго, Егоже ученик лукавый на смерть предаде; даждь ми Сего страннаго, Егоже Мати зрящи на кресте висяща, рыдающи вопияше, и матерски восклицаше: увы Мне, Чадо Мое! увы Мне, Свете Мой, и утроба Моя возлюбленная! Симеоном бо предреченное в церкви днесь собыстся: Мое сердце оружие пройде; но в радость Воскресения Твоего плачь преложи. Покланяемся Страстем Твоим, Христе, покланяемся Страстем Твоим, Христе, покланяемся Страстем Твоим, Христе, и Святому Воскресению.
Литургия святого Василия Великого в соединении с вечерней
Вместо Херувимской песни
Да молчит всякая плоть человеча и да стоит со страхом и трепетом, и ничтоже земное в себе да помышляет: Царь бо царствующих, и Господь господствующих, приходит заклатися и датися в снедь верным. Предходят же Сему лицы Ангельстии со всяким Началом и Властию, многоочитии Херувимы и шестокрилатии Серафими, лица закрывающе, и вопиюще песнь: Аллилуия, аллилуия, аллилуия.
Задостойник, глас 6-й
Не рыдай Мене, Мати, зрящи во гробе, Егоже во чреве без семене зачала еси Сына: востану бо и прославлюся, и вознесу со славою непрестанно яко Бог, верою и любовию Тя величающия.
Днем в Великую Субботу начинается освящение куличей, пасох и яиц.
Церковный Устав строго требует, чтобы все поклоны совершались по предписанному и одновременно со священником.
Словом «неделя» называется воскресный день. «Седмица» – семь дней, период с понедельника по воскресенье.
Глас недели указывается в Православном календаре.
Глас воскресных тропарей указывается в Православном календаре
По сложившейся богослужебной практике эти службы совершаются в воскресенье и вторник вечером
Странствия Владычня – гостеприимства Владыки
© Онлайн библиотека сайта Православие и мир, 2011–2024
